In die kollig: Kim Syster maak naam in Binnelanders
Dié Binnelanders-nuweling sal nog vir hope drama sorg
WELKOM BY BINNELANDERS
Kim het onlangs haar buiging in die kykNET-sepie Binnelanders gemaak as dr. Jax Davids, ’n algemene praktisyn wat in ’n hospitaal in die Kongo gewerk het. Sy is nou terug in Pretoria ná al die drama in Afrika. Haar grootste bekommernis is dat dr. Deon Visser (Pietie Beyers) se toestand nie verbeter nie. Danny Jantjies (Bradley Olivier) is ’n welkome afleiding vir Jax, wat haar weer in die stad moet vestig nadat sy so lank in die “bos” gepraktiseer het.
“Ek en Jax het baie gemeen: Ons is albei sterk vroue en maak nie ’n moordkuil van ons hart nie. As ons ’n ding wil sê, sê ons dit,” vertel Kim (30).
Haar karakter is baie impulsief en beland gereeld in die sop daaroor, vertel sy. “Dit, en die feit dat sy nie bang is om haar mond oop te maak nie, sal nog vir baie drama sorg.”
STEEK ORAL KOP UIT
Dié boorling van die Wes-Kaapse dorpie Mamre woon tydelik in Johannesburg terwyl sy aan Binnelanders verfilm. Kim is geen groentjie op die kassie nie. Sy is al sowat 11 jaar in die vermaakbedryf en het al in dramareekse soos Erfsondes en Sterlopers gesig i gewys. S Sy i is ook kl later t vanjaar in die nuwe kykNET-dramareeks Spoorloos te sien as die aspirantjoernalis Sonja Landman. “Dit was ’n lekker rol, want die karakter is ambisieus en probeer ’n storie oopvlek, wat dit spanningsvol gemaak het. Sy is verstrooid, maar probeer steeds hard om haar werk te doen.”
VELE GESIGTE
Sy het al op 10 besluit sy wil eendag ’n aktrise word, vertel Kim. Sy het in 2005 aan die Hoërskool Parow in die Kaap gematrikuleer en toe toneelspel aan CityVarsity studeer. Sy het die een oudisie ná die ander afgelê voor sy haar eerste rol losgeslaan het in die Amerikaanse fliek van 2013 Death Race 3: Inferno, wat in die Kaap verfilm is. “Ek het teenoor Danny Trejo gespeel. Ek was ’n verpleegster en Danny se karakter se stukkie,” vertel sy. “Daarna het baie harde werk gevolg tot waar ek vandag ’n dokter in Binnelanders speel.”
Sy raak nie sommer opgewonde oor sterre wat sy ontmoet nie. Tog bieg sy: “Ek kan dalk net flou val as ek Marc Lottering ontmoet.”
En wie is Kim tuis? Wat jy sien, is wat jy kry, sê sy. “En ek is die gelukkigste in ’n kombuis.” In haar vrye tyd kook sy en kyk werklikheidstelevisieprogramme. “Ek sou beslis meel in die oë van die deelnemers van The Great Bake Off kon skop,” skerts sy.