WARE LIEFDE BLY MY ONTWYK

Ek is nou in my 50’s, maar kon nog nooit iemand kry vir wie ek lief is en wat vir my lief is nie. Ek wil so graag iemand ontmoet saam met wie ek kan oud word. Ek wil nie meer alleen wees nie. Wat kan ek doen?

AD, SMS

Dit help nie om nou impulsief of oorhaastig op te tree net om ’n lewensmaat te kry nie. ’n Ring aan die vinger is geen waarborg vir geluk nie. Hoe kan ’n mens dit verander? Dis eers wanneer jy jou ingesteldheid aanpas dat jy jou lewe kan vernuwe.

Ek is seker jy het al die meeste moontlikhede ondersoek om liefde te vind. Tog neem ’n mens se lewenskoers ’n ander wending as jy self ’n koersaanpassing maak.

Beweeg uit jou gemaksone en ontmoet nuwe mense deur nuwe dinge te doen.

Sluit byvoorbeeld by ’n stapklub aan of neem deel aan aktiwiteite by jou kerk. Om ’n kompromis aan te gaan is ’n pad na persoonlike groei.

Hoë verwagtings van die lewe en liefde laat ’n mens dikwels met ’n onvergenoegdheid oor dit wat kon gewees het.

Jy het dalk ’n verhouding gehad wat onnodig voortydig oor kleinighede beëindig is.

Is daar nie dalk iemand saam met wie jy ’n pad geloop het sodat jy weer ou drade kan optel nie?

Op jou ouderdom is dit ’n goeie idee om na bestaande vriende se vriende uit te reik, asook om skoolvriendskappe te hervat. Jy sal ook verbaas wees hoe vernuftig vriende en familie kan wees as jy stilweg laat val dat jy na ’n maat soek.

Aanlyn liefdesoektogte is ’n opsie vir vele alleenlopendes, maar moet met groot omsigtigheid aangepak word.