PLATBROOD OF PIZZA

LEWER 6 BEREIDING: 10 MIN. BAK: 8-10 MIN.

1 kg brooddeeg VIR DIE PLATBROOD 200 g botter, gesmelt 6 knoffelhuisies, fyngedruk 125 ml (½ k) vars koljander, grofgekap 20 vars basilieblare 2 sprietuie, fyngekap sout en peper VIR DIE PIZZA 125 ml (½ k) ui, gekaramelliseer 200 g blokkies spek, gebraai 100 g bloukaas 30 g roket Voorverhit die oond tot 200 °C. Hou twee bakplate byderhand. 1 Verdeel die deeg in ses stukke en rol uit op ’n oppervlak wat liggies met meel bestrooi is. 2 Trek ’n stuk deeg aan albei punte om dit langer te maak en rol tot ’n dikte van 1-2 mm uit. Herhaal met die res van die deeg.

3 Vir die platbrood Voer ’n bakplaat met bakpapier uit en plaas die uitgerolde deeg daarop. Plaas nog ’n bakplaat bo-op om die brood plat te hou. Bak 8-10 min. 4 Meng die botter, knoffel, kruie, sprietuie, sout en peper in ’n bak en verf dit oor die warm platbrode. Sit voor saam met sop of in stukke gebreek op mezze- of kaasborde.

5 Vir die pizza Voer die bakplate met bakpapier uit. Smeer die gekaramelliseerde ui op die uitgerolde deeg. Verdeel die spek en kaas tussen die pizzabasisse en bak tot die kaas gesmelt het. Strooi die roket oor en sit voor.