WIL ONTDUIKERS OP SWARTLYS KRY
Kan ek my eks by skuldeisers aangee sodat sy naam op ’n swartlys verskyn? Hy betaal nie onderhoud vir die kinders nie, al het hy die geld. My kinders se stiefma kry ook ’n salaris. Kan ek onderhoud by haar eis? Riki, SMS Volgens bepalings van die Wysigingswet op Onderhoud wat aan die begin van die jaar in werking getree het, kan onderhoudsbeamptes by howe die persoonlike besonderhede van wanbetalers en ontduikers van onderhoud aan kredietburo’s verskaf. Jy kan dit gerus met die onderhoudsbeampte bespreek by die hof waar jou onderhoudsbevel toegestaan is. Geen krediet sal aan iemand toegestaan word wat agterstallig is met onderhoudsgeld nie. As die adres en telefoonnommers van so ’n wanbetaler nie bekend is nie, kan die hof selfs selfoonverskaffers verplig om hul kontakbesonderhede beskikbaar te stel. Die hof kan ook getuies dagvaar om feitelike bewyse te gee van die finansiële posisie van iemand wat by die onderhoudshof aangekla word.
As jou eks en sy nuwe vrou binne gemeenskap van goedere getroud is, sal haar bydrae tot die huishouding in aanmerking geneem word wanneer die onderhoudsbedrag uitgewerk word.
Stiefouers wat buite gemeenskap van goedere getroud is, kan nie wetlik verplig word om hul stiefkinders te help onderhou nie.
Gaan na www.justice.gov.za/vg/mnt. html vir nog inligting.
‘Intimiteit hang baie af van hoe veilig iemand in ’n verhouding voel’ – ELIZE