MENTOR MET DIE X-FAKTOR
Tarryn Lamb se reis na musieksukses het 16 jaar gelede in Idols begin; deesdae is sy ’n ster uit eie reg wat ook ander se talent slyp
HAAR naam klink skielik oral op. Op die kassie sien ons haar as een van die vier bekendes uit die plaaslike musiekbedryf wat aspirant sangers touwys maak in die nuwe VIA-werklikheidsreeks Die Kontrak. En oor die radio hoor ons haar engelstem liedjies sing van haar nuwe debuutalbum, Mal oor Jou.
Tog is die sexy donkerkop geen nuweling op die toneel nie. Tarryn Lamb het die suksesleer stadig maar seker geklim vandat sy as blinkoogtiener in 2002 die top-50 in die eerste seisoen van die sangkompetisie Idols gehaal het.
Nou kan sy eindelik die vrugte pluk van 16 jaar se harde werk, uithou en aanhou.
Barry Pretorius, die konsertregisseur van Afrikaans Is Groot, praat met groot lof van haar. “Die sogenaamde X-faktor is maar yl gesaai, maar dis vir Tarryn so natuurlik soos asemhaal. Die stem, die volle pakket, die manier hoe sy ’n gehoor in die palm van haar hand hou, is merkwaardig. Sy sou ’n superster in enige land en taal kon wees,” meen hy.
En nou deel sy haar suksesgeheim met die twee deelnemers aan Die Kontrak wat sy onder haar vlerk geneem het. Tarryn het Tyral-Lee Miggels (20), wat intussen uitgeval het, en Tatum Strydom (17) self uit honderde video-inskrywings vir die TV-sangkompetisie gekies. “As mentor is ek daar om te help, met talent te werk en deelnemers af te rig,” verduidelik sy. “Ek wil deelnemers gemaklik laat voel, want ek verstaan hoe dit in kompetisies is.”
Tarryn, wat ook al as Kim Adams in die kykNET-sepie Suidooster was en ’n Safta vir beste vroulike byspeler vir haar rol gewen het, lag uit haar maag toe sy aan haar eie deelname as 17-jarige aan Idols terugdink. “Oe nee, ek was terrible ! Want ek was heeltyd so op my senuwees,” onthou sy.
Daardie eerste, skrikwekkende ervaring voor die TV-kameras help haar nou verstaan hoe die hoopvolle deelnemers aan Die Kontrak voel.
Soos die naam aandui, wentel alles om ’n kontrak – ’n platekontrak van Coleske Artists ter waarde van R1 miljoen waar- mee die wenner sal wegstap. Elk van die agt deelnemers kry aan die begin van die kompetisie ’n kontrak, maar dié word opgeskeur namate hulle week ná week een vir een uitgeskakel word.
Die druk van televisiesangkompetisies soos dié het Tarryn destyds as Idols-deelnemer tot trane gedryf. “Ek onthou ek het heeltyd gehuil; ek was so op my senuwees.
“En toe ek uitgestem is, was ek platgeslaan. Dit het vir my gevoel of my hele wêreld ineenstort,” sê sy met ’n tikkie drama in haar stem.
Dan lag sy en neem ’n slukkie van haar cappuccino waar ons in haar gunstelingrestaurant in Kalkbaai, Kaapstad, gesels. Sy het ’n entjie hiervandaan in Ocean View grootgeword as die middelste van pa Devon Lamb en ma Lynne se drie kinders. Haar pa was voor sy aftrede ’n sjef en adjudantoffisier in die vloot en haar ma ’n onderwyseres. Sy het ’n ouer broer, Clinton, en jonger suster, Tatum.
Tarryn, wat nou in Plumstead in die suide van Kaapstad woon, was tot sowat ’n jaar gelede die voorsanger van die Engelse musiekgroep BlackByrd. Tog het sy besluit om haar debuutalbum as solo-
sanger in Afrikaans uit te reik. reik
“My pa is Afrikaans en my ma Engels,” verduidelik sy en skerts: “Ek praat maar ’n mengelmoes.”
Op ’n ernstiger noot vertel sy: “My pa is so trots dat ek nou ook in Afrikaans sing.”
HAAR eerste treë in die mededingende musiekwêreld het sy as ’n bloedjong Idols-deelnemer gegee. “Dit was my eerste keer in Johannesburg, my eerste keer op ’n vliegtuig en die eerste keer dat ek blootgestel was aan musiek wat ek nie by die skool gesing het nie,” vertel sy terwyl die stuifreën buite oor die grys see neersif.
Toe sy uitgestem word, was dit nie die einde van haar musiekdroom nie. Net ná matriek het Tarryn ’n oudisie afgelê vir die musiekspel Fame by die Kunstekaap in Kaapstad.
“Die vervaardiger (Hazel Feldman) het my ná my oudisie gevra of ek sal gaan studeer as sy vir my studie betaal. Ek het net gedink: Wa-a-at? Dit was vir my ongelooflik. Ek het nou wel nie die rol in die musiekspel gekry nie, want ek was nie in dans en drama opgelei nie, maar sy het my potensiaal raakgesien.” Sy het daarna vier jaar lank aan die Waterfrontteaterskool in Kaapstad studeer.
Sy was skaars met haar studie klaar, toe speel sy in David Kramer se musiekteaterproduksie The Kramer Petersen Songbook. “En daarna was ek in die Madame Zingara-produksie as lid van die groep Step Sisters. Ons was amper soos daai Dream Girls, almal met die stywe rokkies wat so uit- flare,” en sy beduie met haar hande al langs die pype van haar modieuse jeans af.
In 2009, met die Wêreldbekersokkertoernooi om die draai, het Tarryn saam met ’n musiekbestuurder besluit om ’n musiekgroep te begin. Hulle het ’n advertensie op die webtuiste Gumtree geplaas om nog twee lede vir die nuwe groep, La Vuvuzela, te kry.
“Ek is in daardie stadium baie deur Lady Gaga geïnspireer, en ek het gedink as ander sulke weird en funky kostuums kan dra, kan ons seker ook . . .”
Nadat sy begin liedjies skryf en kitaar leer speel het, het sy met die idee vir BlackByrd vorendag gekom – ’n groep met van dieselfde lede as La Vuvuzela, maar met ’n nuwe styl en klank. Hulle het vyf jaar lank saam opgetree. “Ons was dikwels die enigste Engelse musiekgroep op Afrikaanse feeste,” onthou sy.
Tarryn het van BlackByrd se treffers self geskryf, soos I Feel Good Today, wat die temalied van SABC3 se ontbytprogram Expresso geword het. Sy meen sy kry haar skryftalent van haar ma, Lynne. “My ma is ook baie lief vir skryf. Sy sê altyd ’n liedjie moet huil. Jy moet hom kan vóél.”
Tarryn bring haar vrye tyd deur saam met haar familie en verloofde, Lester Timothy, ’n prokureur. “Ons ry graag bergfiets en is ook dol oor reis,” vertel sy. En tussendeur beplan sy hul troue in November. “Hy is my beste vriend en so ’n cool mens,” borrel sy.
Toe sy met die geklikklak van haar hoë hakke uit die restaurant stap, laat sy met haar welige bos hare en vietse lyfie omtrent die koppe draai. Dan groet sy soos ’n ou vriendin en stap weg terwyl die son eindelik in Kalkbaai deur die reënwolke breek.
Die Kontrak word elke Woensdag op 20:00 op VIA (kanaal 147 op DStv) uitgesaai.