Spaar met dié sakpas seekosresepte

Ons berei ’n fees sonder duur bestanddele – en jy hoef nie aan die kus te woon nie

VISFRIKKADELLE MET SALSASLAAI

Met ’n paar blikkies tuna kan ’n mens wonders verrig. Ons rek dié frikkadelmengsel met aartappel en kool en sit dit voor saam met salsa. GENOEG VIR 4 MENSE BEREIDING: 20 MIN. VERKOEL: 15 MIN. GAARMAAK: 30 MIN. FRIKKADELLE 30 ml (2 e) olyfolie 1 ui, gekap ¼ kopkool, gesnipper 2 x 170 g-blikke tunastukke, gedreineer 4 aartappels, gaar gekook, geskil en rofweg fyngedruk gerasperde skil van 1 suurlemoen ’n hand vol vars pietersielie, gekap sout en witpeper ekstra olie vir vlakbraai SALSA 1 ui, gekap 3 tamaties, in blokkies gesny 1 x 410 g-blik pitmielies, gedreineer ’n hand vol vars pietersielie, gekap 2 knoffelhuisies, fyngedruk 1 brandrissie, gekap, opsioneel ’n knippie suiker 30 ml (2 e) witwynasyn sout en vars gemaalde swartpeper

1 Frikkadelle Verhit die olie in ’n pan en braai die ui tot sag. Voeg die kool by en roerbraai tot verwelk. Skep uit en hou eenkant. 2 Plaas die tuna, aartappels, suurlemoenskil en pietersielie in ’n mengbak. Voeg die koolmengsel by en meng goed. Geur met die sout en witpeper na smaak. 3 Rol okkerneutgrootteballetjies van die mengsel en pak op ’n bord. Bedek dit met kleefplastiek en laat minstens 15 min. in die yskas verkoel. 4 Verhit genoeg olie in ’n diep pan vir vlakbraai en braai die frikkadelle in sarsies tot goudbruin en deurwarm. Dreineer op kombuispapier.

5 Salsa Meng die bestanddele goed en geur met die sout en peper na smaak. Sit die salsaslaai voor saam met die frikkadelle.