DEPRESSIE NIE NET PSIGIESE SIEKTE
Wanneer jy oor depressie skryf, kan jy benadruk dit is ook ’n ernstige fisieke siekte en nie net psigies nie. Medikasie is broodnodig. Selfdood kan baie maklik volg sonder medikasie of as dit skielik gestaak word. Ek weet dit baie goed, want daar is depressielyers in ons familie. Baie dankie vir jou leersame en wyse raad. CB, SMS
Depressie raak die gemoed én die liggaam. Gediagnoseerde depressie is behandelbaar en kan nie weggedink of weggewens word nie. Om dit doeltreffend te beveg, is medikasie en berading nodig.
Die medikasie balanseer sekere neuro-oordragstowwe in die brein soos serotonien, waarvan die vlakke dalk te laag is.
So ’n wanbalans keer dat inligting tussen die senuselle doeltreffend oorgedra word en kan simptome soos angsgevoelens of fisieke simptome soos ’n aansienlike gewigstoename of -verlies tot gevolg hê.
Antidepressante kan depressielyers help om daagliks te funksioneer en ook fisieke simptome soos te veel of te min slaap verlig. Daarvoor moet die regte dosisse van die medikasie vir ’n sekere tyd in oorleg met ’n dokter of psigiater korrek geneem word.
Oorgerustheid wanneer die simptome verlig word, kan depressielyers hul medikasie laat staak, maar dit kan lewensgevaarlik wees.
Omdat party antidepressante newe-effekte soos diarree en naarheid het, kan depressielyers maklik besluit om hul behandeling te staak. Praat met jou dokter of psigiater hieroor.
As jou toestand nie verbeter nie, jy onverwags buierig is en die medikasie nie meer vir simptome soos huilbuie help nie, gaan spreek ook jou dokter of psigiater.