A Star Is Born
Dit gons oor Lady Gaga en Bradley Cooper se spel in dié musiekdramaprent
NIE NET NÓG ’N WEERGAWE NIE
Bradley Cooper maak nie net sy regisseursdebuut in dié vierde weergawe van A Star Is Born nie. Hy het die fliek help skryf en vervaardig en speel ook daarin. Cooper (43) speel Jackson Maine, ’n countryrockster met ’n drankprobleem, wat die talentvolle sangeres Ally onder sy vlerk neem. Ally word deur Lady Gaga, oftewel Stefani Germanotta (32), gespeel. Dié weergawe is anders as die vorige flieks, want Jackson sit nie in sak en as oor alkoholisme nie. “Ek wou nie ’n ou hê wat jaloers is op iemand anders wat beroemd raak nie,” sê Cooper. “Ek het ’n regte liefdesverhaal gesoek; twee gebroke mense vind mekaar, maar kan nie reggemaak word nie.” SY SOEKE NA ALLY
Cooper sê hy was net vaagweg bewus van Lady Gaga voor hy die fliek gemaak het. Maar toe hy haar sien optree, het hy geweet sy moet Ally speel. “Ek was by ’n kankergeldinsamelingsgeleentheid saam met my ma. Hulle het ’n musiekgas as verrassing gehad en Stefani het uitgekom en La Vie en Rose gesing. Ek was verstom. Ek het die volgende dag haar agent gebel en gesê: ‘Kan ek dadelik na haar huis toe gaan en haar ontmoet?’ Ek het toe Malibu toe gery en ons het op haar stoep gesit. Toe ek weer sien, eet ek spaghetti en frikkadelle en ek vra: ‘Kan ons ’n liedjie saam sing?’ ”
Cooper se stem het haar beïndruk. “Toe hy na my toe kom, het hy onmiddellik soos ’n sielsgenoot gevoel. En toe ek hoor hoe sielvol sy stem is, het ek geweet die fliek sal werk.” SILWERDOEKDEBUUTUT
Sy is reeds ’n popkoningin uit eie reg en het al op die kassie naam gemaak. Sy het selfs ’n Golden Globe vir beste aktrise in ’n beperkte TV-reeks losgespeel as die Countess in die vyfde seisoen van die gruwelreeks American Horror Story: Hotel. A Star Is Born is haar eerste groot fliekrol.
“Op baie maniere voel ek Bradley het my onthul. Dit was sy idee om ontslae te raak van die grimering, om weer terug te gaan na my natuurlike haarkleur en vir dít om Ally se karakter te wees. Die vertroue wat ek op die stel in hom gehad het, het vir ’n merkwaardig kunstige ervaring gesorg,” sê sy.