101 DALMATIONS

LEWER 1 VIERKANTIGE KOEK, GENOEG VIR 20 PORSIES BEREIDING: 20 MIN. BAK: 40 MIN. AFKOEL: 30 MIN. KOEK 120 g bruismeel 120 g kakaopoeier 10 ml (2 t) kitskoffiepoeier 3 ml (milde ½ t) koeksoda 3 ml (milde ½ t) bakpoeier 120 g droë klapper 120 g fyn amandels 250 ml (1 k) klappermelk 15 ml (1 e) suurlemoensap 250 ml (1 k) gaar fyn pampoen of botterskorsie 300 g bruinsuiker 125 ml (½ k) olie 5 ml (1 t) vanieljegeursel

VERSIERSEL

100 g donkersjokolade, gekap 250 ml (1 k) room, geklits basiese versiersel x 1

VIR VERSIERING

500 g gewone wit plastiekversiersel swart en rooi koskleursel koekievorm van ’n hondepootjie (jy kan dit by ’n bakwinkel koop) eetbare silwer verf Voorverhit die oond tot 180 °C. Smeer twee 20 cm-koekpanne en bestuif met meel.

1 Koek Sif die meel, kakaopoeier, kitskoffie, koeksoda en bakpoeier saam. Voeg die klapper en fyn amandels by. 2 Plaas die res van die bestanddele in die bak van ’n voedselverwerker en puree tot glad. 3 Voeg die meelmengsel by en meng goed. Skep die beslag in die bereide bakpanne en maak die bokante gelyk. 4 Bak 40 min. of tot ’n toetspen skoon uit die middel kom. Laat effens in die panne afkoel en keer dan op ’n draadrak uit om heeltemal af te koel. Sny dit dan in twee gelyke helftes.

5 Versiersel Plaas die sjokolade in ’n glasbak en smelt dit ’n minuut in die mikrogolf terwyl jy dit elke 30 sek. roer. Hou nog ’n minuut aan met roer om dit effens te laat afkoel voor jy dit by die geklitste room invou. Plak die koeke met die sjokoladeroom op mekaar vas en sit vir sowat 30 min. in die yskas om styf te raak. 6 Maak die versiersel volgens die resep. Haal die koek uit die yskas, plaas op ’n koekbord en smeer die versiersel so glad moontlik oraloor die koek. Sit dit terug in die yskas. 7 Vir versiering Rol die plastiekversiersel uit op ’n oppervlak wat liggies met mielieblom bestrooi is. Bedek die koek met die plastiekversiersel en stryk dit met ’n fondant- spatel glad. Sny enige oortollige versiersel af. Kleur van die oorskietversiersel swart vir die pote en rooi vir die kraag. 8 Rol die swart versiersel uit, druk pootafdrukke daarin uit en versier die koek oral daarmee deur ’n bietjie water as gom te gebruik. Rol die rooi uit en sny ’n strook met ’n breedte van sowat 3-4 cm en ’n lengte van sowat 20 cm uit. Plaas dit om die voet van die koek. Vorm ’n halsband van die plastiekversiersel en verf dit met eetbare silwer verf. Plaas dit op die rooi halsband aan die voorkant van die koek.