BEKENDESSEHUISE INPUINGELÊ
Honderdduisende Kaliforniërs moes vlug voor die wegholbrande wat deur die Amerikaanse deelstaat woed, en talle spoghuise is tot op die grond afgebrand. Ook die glansmense is nie ontsien nie.
Die sangers Robin Thicke en Miley Cyrus en die akteur Gerard Butler het aanlyn vertel hul huise is vernietig in die brande in die suide van Kalifornië.
Robin se meisie, April Love Geary, het op Instagram ’n foto geplaas van die oorblyfsels van die huis van sowat R34 miljoen waarin sy, die 41-jarige Blurred Linessanger en hul dogter, Mia (8 maande), woon.
’n Stroewe Gerard (48) is afgeneem toe hy na sy eiendom in Malibu terugkeer – net betyds om te sien hoe die vlamme dit verteer.
Hy het ’n foto op Instagram van die verwoesting gedeel terwyl hy voor die oorblyfsels van die gebou en sy uitgebrande trok gestaan het.
“Na my huis in Malibu teruggekeer nadat ek dit ontruim het. Hartverskeurende tye oral in Kalifornië,” het die Den of Thievesakteur by die kiekie geskryf.
Miley (25) het op Twitter onthul sy en haar kêrel, Liam Hemsworth (28), is ook onder die Kaliforniërs wat ’n huis verloor het.
“Totaal verslae oor die brande wat my gemeenskap raak. Ek is een van die gelukkiges. My diere en die liefde van my lewe het veilig uitgekom en dis al wat nou saak maak. My huis staan nie meer nie, maar die herinnerings wat ek saam met familie en vriende gedeel het, staan sterk,” skryf die musikant.
“Ek is dankbaar vir alles wat ek oorhet,” sê Miley, wat in haar liedjie Malibu aan die Kaliforniese natuurskoon hulde bring.