GEKLEURDEGLAS-KOEKIES
Hierdie koekies is tog te mooi! Gebruik dit as versierings op die Kerstafel of hang dit aan die Kersboom. (Of eet hulle, natuurlik.)
LEWER ONGEVEER 36 KOEKIES (AFHANGEND VAN DIE GROOTTE) BEREIDING: 35-40 MIN. VERKOELTYD: 15 MIN. BAKTYD: 8-10 MIN.
KOEKIES 250 g botter of margarien 250 ml (1 k) witsuiker 60 ml (¼ k) gouestroop 60 ml (¼ k) water 750 ml (3 k) koekmeel 2,5 ml (½ t) bakpoeier 2,5 ml (½ t) sout meel, vir strooi VIR AFRONDING 1 x 400 g-pak Sparkleslekkers
Voorverhit die oond tot 160 °C. Voer 2 groot bakplate met bakpapier uit en spuit goed met kossproei.
1 Koekies Klop die botter, suiker en gouestroop saam tot romerig. Voeg die water by en klits glad. 2 Sif die koekmeel, bakpoeier en sout oor die mengsel en meng tot ’n deeg vorm. Verkoel minstens 15 min. 3 Bestrooi ’n werkoppervlak met meel en rol die deeg sowat 2 mm dik uit. Druk vormpies soos verkies. Druk gaatjies in die vormpies sodat daar ’n opening in die middel van elke koekie is.
4 Vir afronding Sorteer die lekkers volgens kleur en maal elke kleur apart met ’n stamper in ’n vysel fyn, of pols die lekkers apart fyn in ’n voedselverwerker. 5 Pak die koekies versigtig op die bereide bakplate en vul die opening van die koekies met die fyngemaalde lekkers. 6 Bak die koekies 8-10 min. of tot die lekkers gesmelt is en die koekies strooikleurig is. 7 Laat die koekies afkoel. Haal versigtig van die bakpapier af en bêre in ’n lugdigte houer. Gaan na huisgenoot. com vir ’n stap-virstap-video wat wys hoe om die glaskoekies te versier.