MILJOENÊRSTAFIES

Ryk en lekker vir spesiale geleenthede. LEWER 36 BLOKKE BEREIDING: 30 MIN. MIKROGOLF: 1 MIN. VRIES: 4 UUR BASIS 200 g veselbeskuitjies 100 g botter, gesmelt VULSEL 1, 8 L vanieljeroomys 500 ml (2 k) groot gesoute grondboontjies BOLAAG 385 g karamelkondensmelk 180 g donkersjokolade, grofgekap 125 ml (½ k) room Voer ’n 23 x 23 cm-koekpan met kleefplastiek uit; laat van die kleefplastiek oor die kante van die koekpan hang. Haal solank die roomys uit die vrieskas.

1 Basis Kap die beskuitjies in ’n voedselverwerker of met ’n koekroller goed fyn. Voeg die botter by en meng goed. Skep die krummelmengsel op die bodem van die bereide koekpan en druk goed vas. Plaas in die vrieskas.

2 Vulsel Skep die roomys in ’n groot mengbak en voeg die grondboontjies by. Meng goed deur en skep bo-op die krummels. Maak glad bo-op. Vries 1 uur.

3 Bolaag Meng die karamel tot glad. Smeer oor die roomys. 4 Plaas die sjokolade en room in ’n mikrogolfglasbak. Mikrogolf 30 sek. en meng goed. Mikrogolf nog 30 sek. en meng tot gesmelt. 5 Giet die sjokolade oor die karamel en maak dit glad bo-op. Vries minstens 3 uur.

6 Vir voorsit Lig die roomys versigtig met die kleefplastiek uit die koekpan. Verwyder die kleefplastiek en sny in groot of klein blokke, soos verkies. Sit dadelik voor en bêre die res in die vrieskas vir later.