James Middleton steel die kollig
Kate se broer, wat onlangs sy stryd teen depressie bekendgemaak het, het ’n magdom Instagramvolgelinge
JARE lank was hy bloot die kleinboet van die twee beroemde susters Kate en Pippa, maar nie meer nie. James Middleton maak vroue wêreldwyd se knieë lam nadat hy sy Instagramprofiel oopgestel het. Die 31-jarige hartebreker het reeds in 2013 by Instagram aangesluit, maar dit was tot nou privaat. Binne die eerste week het sy beskeie 4 000 volgelinge tot 130 000 gestyg, en dit klim steeds. Gaan loer ’n mens by @Jmidy sien jy ’n man met ’n passie vir die buitelug, soos die skilderagtige Skotse hoogland, en vir diere, veral sy geliefde honde. Sy blinkswart spanjoele oorheers omtrent sy Instagramprofiel.
Maar dis James met sy broeiende grysgroen oë, baard en atletiese lyf wat sy volgelinge op hol het. Dit gons oor Kate se oulike broer wat ’n toergids is by ’n hotel in Skotland wat aan Pippa se skoonpa, David Matthews, behoort.
Hy het selfs ’n paar trouaansoeke gehad van vroue wat hulle nie daaraan steur dat hy nou met die Franse finansiële ontleder Alizee Thevenet (29) uitgaan nie. Selfs die Mad Men-aktrise January Jones (41) het van haar laat hoor: “Waar het hy weggekruip,” het sy by ’n foto geskryf van James met ’n pet op die kop waar hy êrens op die platteland op ’n muur sit met sy honde om hom. Nog een het gevra hoekom moet hulle nou eers uitvind Kate het so ’n breker van ’n broer wat soos die akteur Jude Law lyk.
Maar James het om ’n ernstiger rede onlangs die nuus gehaal toe hy vir die eerste keer bekendmaak hy ly so ernstig aan depressie dat hy daarna as ’n “kanker van die gemoed” verwys. Hy erken hy is “ryklik geseën” en leef ’n “bevoorregte lewe”, maar dat dit hom nie teen depressie immuun maak nie.
“Ek het gevoel asof ek misverstaan word; ’n volslae mislukking. Ek wens die gevoel van waardeloosheid en desperaatheid, die isolasie en eensaamheid nie eens my grootste vyand toe nie. Ek het gevoel ek word mal,” het hy in ’n artikel in die Britse Daily Mail geskryf.
“Ek kon geen vreugde of opgewondenheid voel nie. Net hartverkrampende angs het my soggens uit die bed gejaag. Ek het nie aan selfdood gedink nie, maar ek wou ook nie in so ’n gemoedstoestand leef nie.”
In Desember 2017, ná ’n jaar waarin sy geestesgesondheid bly agteruitgaan het,
het hy sy honde in sy motor gelaai en na ’n afgeleë deel van die Meredistrik in die noordweste van Engeland gery.
“Ek het alleen in die sneeubedekte berge gaan stap en ’n paar dae in ’n afgeleë huisie op my eie gebly waar ek uit pakkies geëet het. Ek het eindelik die feit gekonfronteer dat ek nie meer kon uithou nie; dat ek hulp nodig gehad het.”
Hy het daarna by ’n psigiater gaan hulp soek wat hy weekliks besoek het, en vandag het hy strategieë om oor die weg te kom en ’n “nuwe doelgerigtheid”.
Een van die hoofredes waarom James openlik hieroor praat, is dat sy suster Kate saam met die prinse William (36), Harry (24) en Meghan (37), die hertogin van Sussex, die beskermhere is van Heads Together, ’n liefdadigheidsorganisasie vir geestesgesondheid. “Hulle glo ’n mens kan net van die stigma wat aan geestesgesondheid kleef, ontslae raak deur die gesprek hieroor te verander en die negatiewe konnotasies uit die weg te ruim. Dit sou dus nie eerlik wees as ek my eie storie weggesteek het nie.”
JAMES, wat net soos Kate (37) en Pippa ( 35) privaat skole bygewoon het, is uiters beskermend teenoor hulle. Hy is ook na aan sy ouers, Carole (64) en Michael (70). Hy was nog op skool toe dit bekend word sy ousus gaan met prins William uit, en hy het sy bes gedoen om skinderpraatjies te stuit. Hy het selfs toe hy op kosskool was soggens eerste opgestaan om die koerante te kry.
“Ek het enige storie oor my suster uitgeskeur sodat niemand dit kon sien en dan ’n gepratery aan die gang sit nie.”
Hy het op skool gesukkel weens ernstige disleksie en aandaggebrek-hiperaktiwiteitsteuring wat laat by hom gediagnoseer is. Hy het in sy eerste jaar aan die Universiteit van Edinburgh opgeskop. “Ek kon nie op my eie studeer nie. As ek vroeër gediagnoseer is en hulp gekry het, sou die lewe soveel makliker gewees het,” skryf hy in die Daily Mail.
Toe hy ná ’n naweek terugvlieg universiteit toe, het hy besef wat hy eintlik met sy lewe wou doen: “My droom was om ’n koekkoninkryk te bou,” het hy aan die Britse tydskrif GQ vertel.
In 2007 het hy die Cake Kit Company begin, wat doen-dit-self-stelletjies verkoop waarmee mense hul eie partytjiekoeke kan maak. Dit is deur Party Pieces, sy ouers se posbestelwebwerf, verkoop.
In 2009 het hy in die moeilikheid be- land by Buckinghampaleis toe hy ’n aanbod van die tydskrif Hello! aanvaar om 21 koeke te maak om die publikasie se verjaardag te vier. Een van die koeke het ’n foto van prinses Diana opgehad, en hy is op die vingers getik.
Die koekonderneming was nie ’n sukses nie. In 2013 het hy Boomf begin, ’n onderneming wat mense se persoonlike ontwerpe en foto’s op malvalekkers druk asook kaartjies wat ’n konfetti-“bom” loslaat wanneer jy dit oopmaak. James sê hy is iemand met goeie planne, maar hy het ander nodig om dit deur te voer en ’n sukses daarvan te maak.
Sy skuif na Glen Affric Lodge naby Loch Ness in Skotland verlede jaar was kort ná die einde van sy verhouding met die Britse TV-aanbieder Donna Air (39). Hulle het vyf jaar uitgegaan voor sy in Desember 2017 uitgemaak het.
Sy nuwe werkomgewing veroorsaak nogal vir hom verleentheid, want hy verskyn nou gereeld op foto’s waarop hy tipiese Skotse tweed en jagpette dra, maar alles is blykbaar vergewe noudat hy ’n Instagram-ster is. V AN sy twee susters lyk dit of Pippa die naaste aan sy hart is. Hulle het ’n woonstel in Londen gedeel en kuier nog graag saam. Hulle het onlangs saam vakansie gehou in St. Barts, en Pippa se drie maande oue seuntjie, Arthur, was ook saam.
Die twee deel ook ’n liefde vir fiksheid, maar van die uiterste soort. Een van sy Instagramfoto’s wys hulle nadat hulle 13 uur afgelê het in die Ötillö-SwimRun-wêreldkampioenskap ten bate van die Michael Matthews-stigting. Michael was die broer van Pippa se man, ook James, wat in 1999 op 22 tydens ’n sneeustorm op Everest verdwyn het.
James is ook geheg aan sy ousus en wil graag die “beste moontlike oom” vir haar kinders wees.
“Ek wil die koel oom wees,” het hy aan Good Morning America gesê kort ná prinses Charlotte se geboorte. “Die lekker oom.”
Tog erken hy soms is dit nie so maklik om familie te wees van die toekomstige koningin van Engeland nie.
“Ja, dit kan frustrerend word,” sê hy. “Ek werk ongelooflik hard, net soos enigiemand anders. Behalwe dat ek die broer is van iemand wat belangrik is, is en bly ek eintlik net James.”