Op ons speellys: Agt nuwe albums en enkelsnitte
Van enkelsnitte tot albums; van pop tot country. Dié musieklys bevat iets vir almal en sal jou inspireer, meesleur of laat dans
4 BY 4 4WERKE
Die vierstuks Ray Dylan, Liezel Pieters, Nicholis Louw en Elizma Theron is bekend vir hul op-enwakker albums wat langarmliefhebbers na die dansbaan lok. Hul nuutste, in die country/pop-genre, is geen uitsondering nie. Dit bevat ’n klomp oorspronklike liedjies waarvan Hart en die titelsnit uitstaan.
THE COUNTRY COLLECTION STEVE HOFMEYR
As jy ’n country- én Steve-aanhanger is, kan jy nie ’n fout maak met hierdie album nie. Dit bevat goue oues soos Lucille en My Way, asook “nuwer” treffers soos Dancing in the Dark en Kiss You All Over. Die duet Amanda saam met Demi Lee Moore staan uit as die absolute hoogtepunt.
LIVE IN BUENOS AIRES COLDPLAY
Dié dubbelalbum is op die laaste aand van Coldplay se Head Full of Dreams-toer opgeneem. As jy van regstreekse opnames hou, sal jy dié album baie geniet. Hulle sing talle Coldplay-treffers, maar onder dié wat uitstaan, is die nuwe tangoliedjie, Amor Argentina.
STERRE BRAND JAN BLOUKAAS & JANIE BAY
Die rapper Jan Bloukaas span saam met Janie Bay in hierdie polsende elektroniese enkelsnit wat in die emosies van jong liefde en heimwee delf. Dit val in die pop/techno-genre en sal groot byval onder veral jongmense en klubgangers geniet. Peach van Pletzen en Hunter Kennedy se invloed as medewerkers kan duidelik in die liedjie gehoor word.
WHAT IS LOVE? CLEAN BANDIT
Dié Sweedse poptrio se tweede album is volgepak met radiovriendelike treffers wat van tot 2016 dateer. Dit sluit in Symphony (met Zara Larsson) en die Demi Lovato-treffer Solo. Die album word gekenmerk deur sy rekenaarvervaardigde gehalte wat al die liedjies byna dieselfde laat klink. Dis nie sleg nie, net middelmatig.
COUNTRY THINGS ALAN LADD
Met ’n musiekloopbaan wat terugstrek tot in die vroeë 2000’s en talle albums en pryse, is Alan ’n gunsteling onder liefhebbers van tradisionele countrymusiek. Hier sing hy sy weergawes van bekende liedjies soos Blueberry Hill, Crazy en The Older I Get. Die staalkitaar word op die meeste van die verwerkings gehoor.
KRAKE STRAATLIGKINDERS
Krake is die tweede enkelsnit vanaf Verdwyn, Straatligkinders se album wat in November 2018 uitgereik is. Die liedjie, geskryf deur die hoofsanger van die groep, Bouwer Bosch, ondersoek die omvangrykheid van die liefde. Dit is sterk kitaar- en tromgedrewe en val in die pop/rock-genre. Die snit sal die jongklomp se aandag trek.
SECRETS TO MY GROWTH ROLENE STRAUSS
Die voormalige Mej. Suid-Afrika en Mej. Wêreld se album val in die genre “gesproke woord”, wat ook beskryf word as digkuns vir lewende optredes. Dis nog iets nuuts in Suid-Afrika. Dit bevat ’n versameling inspirerende lewenslesse en stories soos deur Rolene vertel en word begelei deur meesleurende agtergrondmusiek.