AS EEN DIE HUIS WIL HOU

Jy wil die pad vat, maar jou eksmaat wil die huis behou. Hier is twee dinge wat moet gebeur:

Nuwe verband Die huidige verband moet gekanselleer word en die persoon wat die huis wil behou, moet ’n nuwe verband uitneem wat slegs in sy/haar naam geregistreer is. Uitgawes soos oordragkoste, hereregte en die registrasie van die nuwe verband moet betaal word. Kry inligting hieroor by webtuistes soos ooba.co.za en sahomeloans.com. Oorkoop van eksmaat se huisaandeel As jou eksmaat ’n nuwe verband as alleeneienaar wil registreer, moet hy jou aandeel in die huis by jou koop sodat dit in sy naam oorgedra kan word. Daarvoor sal julle ’n afsonderlike skriftelike koopkontrak moet opstel wat die transaksie tussen julle formeel uitstippel.

In die kontrak moet julle ooreenkom oor:

Hoeveel jou eksmaat jou gaan betaal. As jy 50% van die huis besit, kan jou eksmaat jou byvoorbeeld 50% van die “wins” betaal. Of hy kan jou net die volle bedrag terugbetaal wat jy tot dusver aan die verband bestee het.

As jy die verkoper is, sal jy waarskynlik uit die bankverband uitbetaal word. Maar kragtens die wet is jou eksmaat ( die koper) aanspreeklik vir die betaling.

Jy kan jou aandeel in die huis aan jou eksmaat skenk, maar julle sal steeds ’n kontrak moet opstel. As jou aandeel van die huis meer as R100 000 werd is, sal jy waarskynlik “skenkingsbelasting” moet betaal. Besoek www.sars.gov. za vir inligting hieroor.