’N NUWE JAAR – NUWE REDES OM VERSEKERING TE KRY
Sorg dat jy gedek is wanneer dit tel – maak só seker jy is verseker en word sonder moeite uitbetaal
NET soos jy jou huis in die lente goed skoonmaak, moet jy jou versekeringspolisse en besittings nagaan om teleurstelling op lang termyn te voorkom. Min Suid- Afrikaners maak die tyd om ’ n jaarlikse hersiening van hul versekeringsbehoeftes en polisse te maak om vas te stel of dít waarvoor hulle betaal in werklikheid is wat hulle benodig.
Doen jouself aan die begin van die nuwe jaar ’ n guns en kom op die hoogte van die besonderhede van jou bestaande versekeringspolis, en vermy so enige verrassings.
KRY ’N WAARDASIESERTIFIKAAT
Nie baie mense besef dat vir jou eis om geldig te wees jy jou juweliersitems professioneel moet laat waardeer om die egtheid te bevestig en ’n akkurate markwaarde te verseker nie. As jy nie ’n waardasiesertifikaat het nie, kan jou eis verwerp of tot ’n voorafbepaalde bedrag beperk word.
VERWYDER DEKKING WAT JY NIE BENODIG NIE
As jou huishouding twee of drie voertuie het, is dit hoogs onwaarskynlik dat jy motorhuurdekking benodig.
In baie gevalle kan dit jou maandelikse premie help verlaag.
WERK JOU MOTORPOLIS BY
Het dinge in jou lewe verander? Party faktore verander jou premie en verlaag dit soms. Is jy byvoorbeeld onlangs getroud? Dalk het jy na ’n nuwe huis getrek of van werkplek verander?
Dié dinge kan jou premie verlaag! As jy net derdeparty- of brand- en diefstalversekering het, oorweeg dit om omvattende versekering uit te neem.
STEL ’N INVENTARIS OP
Kyk wat jy in werklikheid in jou huis het, neem onlangse verkrygings oor die vakansietyd in ag en maak seker jy is voldoende verseker. Het jy in die vakansie ’n nuwe televisie, horlosie of juweliersware gekry? Dis belangrik om jou versekeringspolis met die nuwe items by te werk om te verhoed dat jy onderverseker is.
Juweliersware is ’n hoërisikoversekeringsitem – afgesien daarvan dat diewe veral duur besittings soos ringe of horlosies teiken, is dit ook items wat gereeld verloor of beskadig word.
As jy graag reis of jou juweliersware op die strand dra, is wêreldwye allerisikoversekering vir jou ’n moet.
HEROORWEEG JOU DEKKINGSOPSIES
As jy ’n ouer of ou voertuig met ’n lae markwaarde het wat jy suiwer vir sentimentele waardes hou, is dit dalk nie die moeite werd om vir volle versekeringsdekking te betaal nie.
Slegs derdeparty bied dekking as jy in ’n ongeluk met ’n baie duur motor betrokke is, wat uiters duur kan wees as daar bevind word jy was vir die ongeluk verantwoordelik.