IS DIT FIONA SE GESIG 30 JAAR LATER?

Marthie Maré, ’n gesigontleder van Profileworx in Gordonsbaai, het vir Huisgenoot die foto van Lea Sloane in Sunday Times met ’n tienerfoto van Fiona Harvey vergelyk.

Sy maan dat die twee spesifieke foto’s wat sy gebruik het vir die ontleding nie ideaal is nie, maar sekere gelaatstrekke was duidelik. Fisionomie (ontleedkunde) kan nie met gesigherkenning verwar word nie, sê sy. Sy kan nie sê of Lea en Fiona dieselfde mens is nie, maar net hul persoonlikhede ontleed.

“Elke gelaatstrek verteenwoordig ’n aspek van die persoonlikheid en kan verander na gelang van die verandering en ontwikkeling van die persoonlikheid,” verduidelik Marthie.

Fiona Harvey “Die foto van die 12-jarige Fiona wys ’n vriendelike meisie (wye mond en breë neus) wat gemaklik en veilig tussen mense sou voel. Fiona se oë is dieper in die kaste, wat wys sy is aanvanklik bietjie skepties en sal mense nie blindelings vertrou nie. Sy sou besonder lojaal wees teenoor haar vertrouelinge.”

Lea Sloane “Haar smal mond wys sy verkies een-tot-een gesprekke, en haar smal neus dui op ’n onafhanklike werkstyl. Haar ken is nie sterk ontwikkel nie, wat beteken sy vermy konflik. Haar prominente oë dui op ’n behoefte aan insluiting, en die prominente ooglede wys sy wil betekenisvolle verhoudings met mense hê.”

Die gevolgtrekking “As Lea wel Fiona is, het sy verander van ’n vriendelike meisie in ’n jong vrou wat uit haar pad sal gaan om konflik te vermy om in ’n betekenisvolle verhouding aanvaar te word.”