OP ONS SPEELLYS ONE EYE IS KING STIAAN REYNIERSE ALMAL HIER OM DIE VUUR VANILLA

’n Groep gevestigde sangers en ’n paar nuwelinge met ’n musikale allegaartjie wat wissel van rockballades tot elektroniese pop

NABY MY NABY JOU VALESKA MULLER

Dié liedjie het ’n elektroniese dansgevoel en meng pop, reggae en house. Die ballade bring die boodskap dat ewige liefde, wat ’n mens net een keer in jou lewe raakloop, regtig bestaan. “Ek kan myself verbeel hoe ek gaan voel wanneer ek vir die eerste keer aan sy hand vat en in sy liefdevolle oë kyk,” sê Valeska.

SANDKASTELE JULANIE J

“Sandkastele” is hierdie 21-jarige sangeres se tweede enkelsnit wat sy vanjaar uitreik. Die liedjie herinner ’n mens daaraan om die tyd te geniet en mekaar te waardeer terwyl julle kan. Die wysie het ’n ligte pop-inslag met ’n ritmiese koordeel wat goed op die dansbaan sal werk en beslis die voete sal laat jeuk.

Die sanger bring in dié sielvolle snit hulde aan sy pa. Die inslag is countryen folk-gedrewe wat aan party Kris Kristofferson-treffers herinner. Die verwerking is van oordadigheid en elektroniese klanke gestroop, wat dit ’n eerlike gevoel gee. Dis nie vir die dansbaan bedoel nie; eerder saam met ’n nostalgiese glasie wyn.

JOU FOTORAAM EMIL PAUL EN SAMANTHA LEONARD

Dié duet deur die twee deelnemers van die sangkompetisiereeks The Voice is die eerste enkelsnit van Emil se debuutalbum. Dit word vertel vanuit die perspektief van iemand wat ’n geliefde aan die dood afgestaan het en sukkel om met hul lewe aan te gaan. ’n Foto beteken soveel meer as heimwee daaraan gekoppel word.

KANS VAN ’N LEEFTYD JAUNI M

Dié sterk romantiese ballade gaan oor die geleentheid om ’n leeftyd saam met ’n spesiale persoon te kan deel en “daardie deksel vir jou pot” te vind. Dis die perfekte liedjie wanneer jy en jou geliefde stadig close dans en die meesleurende koortjie saamsing. Dis beslis radiotreffermateriaal.

LUISTER JACOBUS SILWER

“Luister” is ’n intieme en gestroopte liefdeslied met ’n sagte intensiteit waar ’n klassieke inslag met ’n moderne aanslag vermeng word. Die sanger som die betekenis en boodskap van die snit so op: “Die liedjie sal mense roer om daardie ou vlam weer op te steek, want ons is nie vir altyd hier nie.”

KONTRAS MIDDELKLAS MIDDELMAN

Dié nuwe rockgroep van Stellenbosch beïndruk met die intrapslag. Die filosofiese woorde van die snit wil weet wat dit beteken om ’n middelklas-middelman te wees. Dit ondersoek ook die verhouding tussen verskillende generasies. Die akoestiese verwerking sal mense in ’n rokerige kroeg in vervoering hê.

Dié vierstuks van Kaapstad het aanvanklik veral in die Engelse liedjiemark onder die jeug naam gemaak met optredes in klubs en op feeste. Dit is maar hul tweede Afrikaanse liedjie, wat beslis ’n nuwe gehoor sal bereik. Die genre is poprock, op die jong klomp gemik en bring hulde aan kuiers saam met vriende. ■