’N BRAAI OM TE ONTHOU
Die wenners van die Grootste Braai van die Jaar-kompetisie het te heerlik feesgevier
HIER in die Bosveld, tussen die koppies buite Swartruggens in Noordwes, het genl. De la Rey en die Britte mekaar tydens die Beleg van Elandsrivier die stryd aangesê.
Vandag is dit egter nie die reuk en klanke van kanonvuur wat hier weergalm nie; dis eerder die vreugdesvure wat hoog brand, want Ceanlia Nel (29) en haar verloofde, Maarten Stols (40), die wenners van Virseker, Huisgenoot en VIA se Grootste Braai van die Jaar, hou groot makietie.
Ceanlia, wat studeer om ’n aptekersassistent te word, en Maarten, ’n ketelmaker, is in ekstase. “’n Groter en lekkerder braai as dié kon ons vir seker nie vra nie,” sê Ceanlia. “Dit is herinnerings wat geld nie kan koop nie,” beaam Maarten.
Die paartjie, wat al nege jaar saam en drie jaar verloof is, kom van Cullinan, maar het die opskop op Ceanlia se aanstaande skoonpa, Maarten sr., se wildplaas kom hou. Hier spog Maarten sr. met ’n persoonlike museum wat onder meer Mauserpatroondoppies bevat wat in die plaaslike loopgrawe opgegrawe is. “Hier is nie ’n enkele Boer dood nie,” vertel hy.
Hy gaan wys ons die gedenkmuur vir die talle Engelse soldate wat hier gesneuwel het. Uit die 1 540 osse, muile en perde is 1 329 dood of vermis.
Ons het probeer skimp dat dié geleentheid die volmaakte voorsmakie is vir ’n Bosveldtroue hier op die plaas, maar van die Groot Dag is daar nog nie sprake nie – die Groot Braai wél.
Om dinge lekker aan die gang te kry, is gaste ’n pons van jenewer, vonkelwyn, granaatsap en pepermentblare bedien. Die grapjas Alvin Bruinders is die seremoniemeester en die sangeres Nádine betower die 20 familielede en vriende in ’n kuieratmosfeer. Die sangers Demi Lee Moore en Gerhard Steyn en die koskenner Herman Lensing kon ongelukkig nie teenwoordig wees nie omdat hulle reeds ander verpligtings gehad het op dié dag. Marinda Engelbrecht van Maklik met
Marinda-faam het die hele pad van Yzerfontein in die Wes-Kaap gereis en haarself oortref met die bykosse. “Ek het op caprese-slaai met vars basilie, mozzarella en tamatieskywe en koue tzatziki met knoffel
besluit omdat dit so blerrie warm is!” Daar is ook kaas en pitabrood, want, meen sy, “as jy ’n broodjie deel, kan die familie nie vir mekaar kwaad wees nie en moet hulle mekaar vergewe”. Vir die hoofgereg is daar karamelpampoentert, groen kruisementertjies en klein aartappeltjies met olyfolie.
“Ek wil nie hê mense moet onrustig eet nie; hulle moet duidelik eet!” sê Marinda. “Ek wil nie hê hulle moet agterna drivethrough toe gaan nie.” En dis maar goed so, want daar is nie een op Swartruggens nie.
Marinda, wat vroeg in 2020 saam met Alvin as beoordelaars in VIA se Laat die
potte prut te sien sal wees, vertel hulle het groot pret. ’n Mens kan verstaan hoekom. “Dis ’n groot ding wanneer ek braai,” sê Alvin ernstig. “Ek nooi my swaers en familie; dan doen húlle al die werk! Hulle sê jy kan nie jou familie kies nie; ek sê ek dóén!”
Gelukkig beman die bobaasbraaiers Willem Bouwer en Quintin Viljoen van Magalies Spit Braai vandag die braaiers. “Ons het hier lamtjops, gemarineerde hoenderdytjies (in marinade met suurlemoen en kruie), varkkortribbetjies en spesiaal gevulde boerewors,” vertel Willem versigtig. Hy weet hy praat met Huisgenoot en wil nie al sy geheime onthul nie. “’n Vuur het maar eenmaal die manier om Suid-Afrikaners bymekaar te bring,” sê Nádine. “Jy kan my arm draai met skaaptjops en aartappels met baie kaas en roomkaas.”
Die nagereg is ook uit die boonste rakke: Marinda se pawlowa met vars bessies en suurlemoensmeer, en Willem-hulle se malvapoeding wat hy op die braaier maak. Hy meen dit sal “families oor die land laat huil”.
Ons huil skelm, want hy wil nie eens sy ouma se resep aan die gasvrou gee nie. Dié malvapoeding het hom na bewering “27 jaar geneem” om te vervolmaak.
’n Mens wonder onwillekeurig wat die soldate hier geëet het. In die museum is ’n artefak van ’n blik boeliebief. Nee wat, De la Rey sou “Virseker” lekkerder by vandag se fees gesmul het.