Andries Bezuidenhout
Se liedjiestories sal jou meesleur
VERMAAK
Van rock tot folk
MUSIEK
Sedert sy dae as hoofsanger van die rockgroep Brixton Moord en Roof het Andries Bezuidenhout (50) kultusstatus bereik. Maar hy sit eintlik op twee musiekstoele: Aanvanklik het hy as ’n hardebaardrocker bekend geword en daarna het hy met sy sololoopbaan’n folk-inslag aangeneem waar sy lirieke storievertellings word. Sy derde soloalbum, Onplaats, bestaan uit 12 liedjies uit sy eie pen. Die Nederlandse liedjieskrywer Herman van Veen het die musiek vir “Tussen platvoet en stoompomp” geskryf.
Hy skryf uit ’n realistiese agtergrond, vertel Andries. “Die karakters in my liedjies en die omstandighede waarin hulle is, is stories waarmee almal kan identifiseer, want dit is so bekend.”
Een van die lekkerste hoogtepunte op die album is “Last Round Regulars”, wat handel oor daardie laatnagdrinkers wat ná middernag hul laaste dop by hul plaaslike kuierplek bestel voor hulle die bus huis toe vat.
Die album is sterk folk-akoesties verpak, met heerlike kitaargedrewe ritmes in liedjies soos “Aasvoëls bo Langenhovenpark”, wat ’n satiriese kykie bied op die gulsigheid van die prokureursberoep.
Dit is ’n album wat nie in dansklubs gehoor gaan word nie, maar wat die fynproewer van musikale digkuns hoendervel-lekker oomblikke sal besorg.
Vanwaar die album se titel?
Dit is sy eerste album wat net digitaal uitgereik is en nie as ’n CD of langspeelplaat gedruk is nie. “Dit is dus nie ’n plaat nie, maar ’n onplaat,” verduidelik Andries. “Aan die een kant is dit ’n nostalgiese gemis om nie die album te kan vashou nie, maar aan die ander kant maak digitale verspreiding dit weer makliker om dit by my ondersteuners in Nederland te kry.”
Die woord “plaats” verwys ook na die Nederlandse woord vir “plaas”. Die meeste liedjies op die album speel teen ’n plattelandse agtergrond af.
Op ’n persoonlike noot
Andries en sy vrou, Irma, woon sedert 2017 op die Oos-Kaapse dorp Alice, waar hy ’n professor in ontwikkelingstudie aan die Universiteit van Fort Hare is. Voor dit was hy onder meer ’n professor in sosiologie aan Tukkies. Uit sy pen het ook twee digbundels, ’n aantal kortverhale en ’n reeks rubrieke gekom wat in die gedrukte media verskyn het. En as skilder in die realistiese genre word sy werke gereeld landwyd op uitstallings gesien. ■