TAP ’N bad
Gee jou vel, lyf en gees ’n salige blaaskans deur in die bad te ontspan
NIE te lank gelede nie kon talle Suid-Afrikaners maar net droom van ’n lekker bad water, want die land was in die wurggreep van ’n ernstige droogte. Maar ná goeie reënval is ’n strelende bad nou weer vir die meeste van ons ’n moontlikheid. Die ware genot van badtyd is om rustig te wees. Jy kan natuurlik ’n “besige” bad hê en jou lyf skrop (en soms die bad ook, want dis moeilik om te ontspan as daar ’n vuil kol vir jou loer). Maar om niks te doen nie werk glo baie goed om jou vel te kalmeer en jou liggaam en jou te verfris.
Warm water – met niks bygevoeg nie – deurdrenk en bevog die boonste lae van die vel. Wend dus ’n lyfolie aan die oomblik dat jy uitklim om die vog te verseël.
“’n Bad is meer bevogtigend as stort, want wanneer jy stort, suig die lugvloei rondom jou van die vog uit jou vel, maar wanneer jy bad, is die water konstant in kontak met jou vel,” sê die Australiese dermatoloog dr. Eleni Yiasemides.
Selfs die styging en daling in liggaamstemperatuur wat ’n warm bad veroorsaak, het gesondheidsvoordele. Dit boots die daling in liggaamstemperatuur na wat saans vir jou liggaam aandui dis tyd om die slaaphormoon, melatonien, te vervaardig. Dus laat ’n warm bad ons makliker aan die slaap raak – dis hoekom ons ook ons kinders by ’n aandroetine van bad-boek-bed hou.
In die gejaagde wêreld kan ’n bad die beste teenmiddel vir die eindelose gehaas en kommer wees. As jy sukkel om te mediteer, kan ’n bad ’n soortgelyke uitwerking hê en angstigheid help verlig. In ’n studie aan die Yale-universiteit in Amerika waarby 400 mense betrek is, is bevind baddens – wat die sensasie van ’n warm omhelsing skep – kan eensaamheid verlig. Veral in afsondering het deelnemers hulself kalmeer deur langer en warmer baddens te neem. En in ’n studie in 2018 is bevind om twee keer per week te bad (en dan warm aan te trek) is ’n beter manier as oefening om depressielyers se gemoed te verbeter – en dis makliker om daarmee vol te hou.
“Vir besige mense is ’n bad dalk die enigste tyd vir ’n bietjie vrede, privaatheid en introspeksie tydens hul week,” sê Suzanne Duckett, skrywer van Bathe, ’n boek oor die ongelooflike gesondheidsvoordele van ’n bad.
“Mense het al van die vroegste tye af baddens gebruik vir hul genesende en verkwikkende uitwerking. Daar is selfs ’n woord daarvoor: balneoterapie,” sê Suzanne. Volgens haar kan jy ’n warm bad neem om spiere te streel (deur die temperatuur te laat styg en pynreseptore te blokkeer), ’n toe bors of neus op te klaar (deur slym met stoom los te maak), gewrigte te laat ontspan (deur die drukking te verlig) en die liggaam te ontgif (deur sweet).
In ’n klein studie is bevind die “passiewe verhitting” wat deur ’n uur lange bad veroorsaak word, kan net soveel kilojoules verbrand as 30 minute se stap. Die bad lei ook verder tot beter bloedsuikerreaksie nadat jy geëet het. En dit alles nog voor jy enigiets by die water gevoeg het!
Dis nie te sê sout, weekmiddels en olies is onnodig nie. Dit kan die effek van ’n warm bad verbeter, veral vir jou vel en psige.
Die jongste produkte het nie sterk geure en ’n oormaat seepskuim nie; dit bevat ’n hand vol uiters doeltreffende natuurlike bestanddele wat inflammasie verlig, van onsuiwerhede ontslae raak en ons help kop skoonmaak.
Eenvoudige plesiertjies vir die vel en siel.
Dit kan help om spiere te streel en gewrigte te laat ontspan
WATTER BAD IS REG VIR JOU?
“Om in olie te bad ‘versag’ die water en maak dit meer bevogtigend,” sê Eleni. Dit is voordelig vir sensitiewe vel, en jy kan vlugtige olies vir ’n multisensoriese ervaring beproef.
Daar is produkte wat velbevogtigers soos arganolie met geurige olies soos wierook meng.
Of jy kan dit self doen deur ’n “draer”-olie soos soetamandel te gebruik en ’n paar druppels van die vlugtige olie van jou keuse by te voeg. Laventel help met slaap, en sitrus is verkwikkend.
’n Aromaterapeut vra gewoonlik ’n kliënt om hul oë toe te maak en waai dan drie verskillende olies onder hul neus om uit te vind waarvan iemand hou.
Die moderne manier om jou bad voor te berei is om ’n tradisionele versagtingsmiddel soos hawer of melkpoeier as basis te gebruik. En binne is alles van die onverwagte (seewier en houtskool) tot die heerlike (pienk klei en roosblare). Die voordele wissel van bevogtiging en suiwering tot hulp met ’n toe neus of bors en ’n verkwikkende gevoel. Die idee is om ’n verskeidenheid weekmiddels op die rak te hê sodat jy elke dag jou bad kan aanpas.
Dr. Hauschka Clarifying Steam Bath R593 vir 100 ml
Sout is die staatmaker vir enigeen met seer spiere, probleemvel of slapeloosheid. Pienk Himalajasoute, wat gevorm is in ’n opgedroogde see uit die Juratydperk, is ’n gunsteling om van pofferigheid ontslae te raak.
Epsomsout (Engelse sout), en veral magnesiumsout, verlig pyn en bevorder slaap deur magnesium deur die vel te vul.
Die bekende sout van die Dooie See help die velversperringsfunksie, hidrasie en teen ontsteking – soos dié met ’n sensitiewe vel sal getuig. Gooi drie keer per week ’n kwart tot 1 koppie sout in jou bad. ■