IS ALLE OUER MANS SO AFSYDIG?

Ek en my man het ’n ouderdomsverskil van byna 10 jaar en is in ons middeljare. Hy is sleg met kommunikasie. My skoonma sê hy was nog nooit iemand wat kan gesels nie. Ons het albei voorheen geskei. Hy kontak my nooit deur die dag nie. Wanneer hy ná werk tuiskom, eet ons en dan kyk hy sy televisieprogramme. As ek hom uitvra, kry ek ’n skewe antwoord. Is mans maar so op daai ouderdom? Ek wil nie my kinders ontstel nie. L op K

Innige verhoudings is moeilik vir mense wat daaraan gewoond is om ander op ’n afstand te hou. Dit gaan nie net daaroor om die kommunikasie tussen julle te probeer verbeter nie, maar ook om die dinge te aanvaar wat jy nie kan verander nie. Besluit wat jy wel kan verander. ’n Wegspringblok is om na jou verwagtings te kyk. Al is hy emosioneel afwesig, beteken dit nie hy is nie lief vir jou nie; eerder dat hy waarskynlik dink alles is reg in sy gemaksone.

Ter wille van jou eie oorlewing, moenie te hoë verwagtings op die emosionele gebied van hom koester nie. Aanvaar dat jy ook jou eie lewe het en nie net op hom en jul verhouding hoef te fokus om vervul te wees nie.

Dit kan die lewe vir jou makliker maak as jy ook dieper verbintenisse met jou kinders of ander familielede of vriende het, of as jy besig bly met stokperdjies.

Tog moet jy nie hoop laat vaar op ’n beter verhouding met jou man nie.

Dink ’n bietjie terug aan die dae toe julle mekaar ontmoet en so ’n hegte verhouding opgebou het dat julle troubeloftes afgelê het. Waaroor het julle toe gesels? Watter belangstellings het julle gedeel? Dis tyd om weer die dinge te begin doen wat julle toe saamgesnoer het.

Nog ’n manier om hom aan die praat te kry is om dikwels sy raad te vra. Of vra sy hulp met iets waarmee jy besig is.

Moenie hom blameer, oordeel, skimp of gelaaide woorde gebruik soos “jy is altyd so . . .” nie. Los ou koeie in die sloot.

Kyk ’n slag saam met hom na sy televisieprogramme en doen die dinge saam met hom wat hy geniet. ■