2 AS EK GEEN KEUSE HET NIE, HOE KRY EK DIE BESTE PRYS?
As jy geen inkomste meer het nie en nie weet wanneer jy weer ’n vaste inkomste sal kry nie, sal jy dalk moet verkoop. Dit is beter as om probleme te ondervind omdat jy maandelikse paaiemente oorslaan.
Die huismark bevoordeel tans kopers omdat rentekoerse gedaal het en daar ’n groot aanbod van eiendomme is. Hier is wat jy in die covid-19-tyd kan doen om die beste moontlike verkoopprys te kry.
Vir die beste verkoop tydens die inperking kan jy die volgende stappe doen:
■ Kry ’n goeie waardasie. Weens covid-19 doen die meeste eiendomsagentskappe nou virtuele waardasies sonder om die eiendom te besoek. Kry minstens drie verskillende waardasies van agentskappe wat jou omgewing – en dus die waarde van jou eiendom – sal verstaan, is Tony Clarke van Rawson Property Group se raad. Onafhanklike waarderingsgroepe soos LightAs stone gee ook waardasieverslae oor jou huis, die kompleks waarin jy woon en jou woonbuurt. Dit bevat ook die geskiedenis van oordragte in jou omgewing. Die verslae kos gewoonlik tussen R70 en R100 per verslag.
■ Kry ’n ervare agent. Moenie val vir beloftes oor die hoogste verkoopprys nie. Kies ’n agent wat sy voorgestelde verkoopprys met deeglike markontleding kan steun, wat jou huis se omgewing en gemiddelde prysklas insluit.
■ Maak seker jou eiendom word raakgesien. Vind uit hoe goed die agent jou huis sal bemark, met byvoorbeeld goeie foto’s en treffende beskrywings aanlyn en in gedrukte advertensies.
■ Blitsverkope: Die groot banke bedryf sedert 2009 ’n bystandsprogram bekend as blitsverkope. Hiervolgens kan jy jou huis in die ope mark sit eerder as dat die bank dit terugneem. Berry sê die doel is vir jou om die beste moontlike prys te kry sodat jy jou skuld kan betaal en terselfdertyd jou kredietrekord beskerm. Die verkopers kry dikwels 80% of meer van die oorspronklike vraprys. Maak seker jy kry genoeg uit die verkoop van die huis om jou uitstaande skuld te delg.
Die huismark bevoordeel tans kopers omdat rentekoerse gedaal het en daar ’n groot aanbod is