Debuutenkelsnitte van opkomende Afrikaanse sangers
Dié week plaas ons die kollig op debuutenkelsnitte en ’n rits opkomende Afrikaanse sangers
TYDELIKE AFLEIDING MARGOT
Dié sangeres het al die verhoog met ander groot name in die bedryf gedeel, maar hierdie enkelsnit is haar eerste oorspronklike uitreiking. Dis ’n nostalgiese ballade wat spreek tot gebroke harte en luisteraars wat van ernstiger lirieke hou. Ek is gevoelloos oor die herinnering, skink nog ’n dubbel gin, sing die jongeling.
ENKELOUER MA GERARD STOOP
Dié prokureur van Pretoria het vir ’n wyle sy regsdokumente opsygeskuif om dié liedjie, waarin hy hulde aan enkelma’s bring, te skryf en op te neem. Dit is ’n sielvolle enkelsnit in ’n storievertelstyl wat sterk aan die werk van die musieken-liriek-beweging van die laat 1980’s herinner.
WEDUWEE SE KRUIK DEHAN
Talle sangers het al hierdie Lucas Maree-treffer opgeneem, maar Dehan se weergawe trek dadelik die aandag. Sy emosiebelaaide rasperstem pas perfek by die snit, met ’n vertolking wat jou na sy komende vollengtealbum laat uitsien. Natuurlik sal dié enkelsnit nie by klubgangers aanklank vind nie.
EK SOEK NET VIR JOU DANI VILLÉ
Die tweede enkelsnit van dié 20-jarige plaaskind van die Wes-Kaap is ’n prettige liedjie met ligte popondertone wat gaan oor ’n meisie wat daardie gevoel van liefde met die eerste oogopslag ervaar. Neem impulsiewe besluite en gryp geleenthede aan, voel sy. “Soms is dit dan die beste besluite van jou lewe!”
DIE HART BERNICE WEST
’n Sangeres van wie popverslaafdes baie sal hou. Sy was verlede jaar die naaswenner van die kykNET-talentsoekreeks Maak my famous en spog met ’n sterk stem en verhoogpersoonlikheid. Dié polsende enkelsnit het binne ’n maand 200 000 kykslae op YouTube gekry. ’n Album word vir later vanjaar beplan.
KRIMINEEL MIA
Hoewel dié sangeres van Potchefstroom al ’n paar jaar lank haar talent op die verhoog bewys het, is dié haar eerste radioenkelsnit. ’n Popliedjie uit die pen van die liedjieskrywer Vaughan Gardiner wat die emosie van ’n onverwagte, smoorverliefde gevoel uitbeeld. Nes ’n krimineel wat iemand se liefde gesteel het, sê Mia.
HARTSBEGEERTE SHAUN NIEUWOUDT
Verlede jaar het hy in Amerika op ’n plaas gewerk en saans in kuierplekke musiek gemaak, maar nou is hy ’n Pretorianer. Shaun se eerste enkelsnit is ’n pop-country-ballade. Sy eksmeisie was die inspirasie vir sy pennevrug, verklap die 23-jarige sanger. “Ware liefde bestaan wel, al dink ons soms nie so nie.”
FLUISTER VAN DIE STRATE CHRISTO BADENHORST
Aanhangers van tradisionele countrymusiek sal gaande wees oor hierdie nuweling en dié enkelsnit. Die liedjie is ’n nostalgiese herinnering van ’n tipiese dorp op die platteland. Al wat nog oor is, is die gefluister van die strate oor dit wat was. Christo is beslis ’n sanger wat ’n mens moet dophou. ■