Mense en Hul Dinge
IN DIE vrolike televisiereeks Glee was die karakters altyd aan die sing en dans, maar talle mense glo lank reeds dié trefferreeks word deur ’n donker vloek geteister. Die aktrise Naya Rivera se onlangse dood blyk nou die jongste van ’n rits tragedies en traumatiese gebeure te wees wat met die musiekkomedie, wat tussen 2009 en 2015 uitgesaai is, verbind word.
Die 33-jarige ster het vroeër vandeesmaand verdwyn nadat sy ’n boot by die Pirumeer in Kalifornië saam met haar vierjarige seuntjie, Josey, gehuur het.
Drie uur nadat hulle uitgevaar het, het iemand op ’n ander boot Naya-hulle se boot sien dryf.
Toe hulle dit nader, het hulle Josey vas aan die slaap aan boord aangetref, maar daar was geen teken van sy ma nie.
Ooggetuies vertel Josey het sy reddingsbaadjie gedra, maar dat ’n volwassene se reddingsbaadjie op die boot gevind is, wat daarop dui dat sy ma nie hare aangehad het nie.
Die seuntjie het later aan ondersoekbeamptes vertel sy ma “het in die water gespring en nie weer opgekom nie”, maar die omstandighede is onduidelik omdat beamptes gesukkel het om die kleuter te ondervra.
Die aktrise se liggaam is intussen in die meer gevind.
’n Polisiebeampte van die omgewing, Chris Dyer, het tydens ’n mediakonferensie ná Naya se verdwyning gesê die Pirumeer was ’n “toevlug” vir die ster, wat op die nabygeleë dorp Valencia grootgeword het.
‘Ek dink hier het ’n tragiese ongeluk gebeur en dit breek my hart’
– CHRIS DYER, POLISIEBEAMPTE