Seun en dubbelgangerkat onskeibaar
Madden en sy kat het albei ’n gesplete lip en verskillende kleure oë – g’n wonder hulle is onafskeidbaar nie
DIS ’n storie wat enigiemand se hart sal laat smelt. Die hoofkarakters is twee beste pelle – Madden Humphreys, ’n negejarige seun wat oor sy voorkoms afgeknou is, en Moon, ’n kat met oë en ’n mond wat nommerpas by dié van sy jong eienaar pas. Die twee is onafskeidbaar. Madden het ’n vriend wat hom aanvaar nes hy is – en hom oral waar hy gaan soos ’n stertjie volg. En Moon het ’n liefdevolle huis en ’n baas wat enigiets vir hom sal doen.
Madden en Moon, wat in Owasso in die Amerikaanse deelstaat Oklahoma woon, het nou ’n klomp volgelinge op Instagram, en hul duisende aanhangers is omtrént gaande oor die vriende.
Die kat het wonders vir die seun se selfvertroue gedoen, sê Madden se ma, Christina. Haar seun is met ’n bilaterale gesplete lip en verhemelte gebore. Hy het ook heterochromie iridum, ’n toestand wat veroorsaak dat sy oë verskillende kleure is.
Teen die tyd dat hy sewe jaar oud was, het Madden al altesaam ses operasies ondergaan om sy gesplete lip en verhemelte te herstel. Maar die letsels van die operasies en sy ongewone spraak as gevolg van sy herstelde verhemelte het hom ’n teiken onder boelies gemaak – en die lewenslustige en vriendelike kind het ál meer onseker en teruggetrokke geraak.
“Die afknouery het werklik sy gees geknak,” sê Christina. “Party kinders het regtig aaklige en gemene goed vir hom gesê.” Drie jaar gelede het Madden ’n internetsensasie geword toe hy in ’n video vir ’n veldtog teen afknouery verskyn het. “Moenie gemeen wees met mense wat anders is nie,” sê hy in die videogreep. “Ons het reeds baie moeilike dinge beleef. Wees gaaf met almal. Jy loop baie wonderlike mense mis as jy met hulle lelik is. Moenie lelik wees nie.”
Die afknouery het stoom verloor namate die veldtog spoed opgetel het. Madden het ’n mate van sy selfvertroue teruggekry, maar dit was eers toe Moon in sy lewe gekom het dat die seun werklik begin blom het.
CHRISTINA het die eerste keer van Moon gehoor toe een van haar vriendinne ’n foto van die kat gedeel het in hul Facebookgroep vir ma’s met kinders met ’n gesplete verhemelte. Die kat was toe in pleegsorg by ’n reddingsorganisasie in Minnesota en het ’n permanente huis nodig gehad.
Christina het nie gehuiwer om hom aan te neem nie. Nie net het Moon ook ’n gesplete lip nie; sy oë is ook verskillende kleure. Nes Madden het Moon ’n groen regteroog en ’n blou linkeroog.
“Hulle was bestem om beste vriende te wees,” skryf Christina in ’n plasing vir haar blog, Love What Matters. “Dis vreemd hoe ’n troeteldier jou minder alleen kan laat voel.” Christina en Madden het die tog van amper 14 uur aangepak om Moon in Minnesota te gaan haal. “Ons is nie gewoonlik spontane mense nie,” sê Christina.
“Maar ons het geweet ons moes die katjie liefhê.”
Sy glo die noodlot wou hê die seun en die kat moes by mekaar uitkom.
“Ek is verstom oor hoe alles afgeloop het. Dit klink laf, maar daar is geen ander verklaring nie. Die katjie was so ver van ons af. Ek is verstom dat ons van hom gehoor het, en nog meer verstom deur die vriende en vreemdelinge wat ons gehelp het om hom te kry en aan te neem.”
Madden en Moon het dadelik gekliek en is nou altyd saam.
“Elke liewe oggend, sonder uitsondering, slaap Moon op Madden se kussing wanneer ek hom gaan wakker maak,” sê Christina. “Madden versorg sy oulike katjie baie mooi. Hy voer hom, maak die sandbak skoon en gee elke dag vir hom vars water sonder dat ek hom daaraan hoef te herinner.”
Christina is dankbaar vir die positiewe uitwerking wat Moon sedertdien op Madden gehad het.
“In ’n wêreld vol boelies sal ons kies om liefde na te jaag,” sê sy.
“Ek dink dis veilig om te sê die katjie is liefde en was bedoel om deel van Madden se reis te wees.”
MADDEN se laaste operasie was in Junie verlede jaar toe hy ’n beenoorplanting ondergaan het om sy gesplete lip en verhemelte te herstel. Dit was sy vierde prosedure in nege maande. Die operasies was veeleisend vir die seuntjie, maar elke keer het hy sy katmaat gehad om hom by te staan terwyl hy herstel.
“Ek is baie dankbaar Madden het vir Moon,” sê Christina. “Nie net sodat hulle albei ’n oulike maat het by wie hulle kan aanklank vind nie, maar ook omdat ek hoop Moon help Madden besef dat om uniek gebore te word ’n ongelooflike ding is. Dat hy betowerend is. Dié twee aantreklike outjies is werklik ’n wonder.”
Christina hoop die aandag wat die gesin kry, kan aangewend word om ander kinders met ’n gesplete lip te help, “al is dit net om bewustheid te skep”.
“Die afknouery steek steeds af en toe sy lelike kop uit,” voeg sy by. “Al wat ons kan doen, is om ons beskouing oor boelies te probeer verander en te probeer verander hoe dit ons raak.
“Ons is vol tekortkomings, nes almal, maar ons sal altyd ons bes doen om deernis teenoor ander te wys, selfs wanneer dit ons moeilikste teenstander is, selfs wanneer ons vir onsself opstaan en selfs wanneer ons voel gaaf wees is die laaste ding wat ons in ’n moeilike oomblik wil doen.”
En dit lyk of klein Madden dié ingesteldheid goed onder die knie het.
Hy het wyse woorde vir enigiemand wat onder boelies deurloop. “As iemand met jou lelik is, wees vriendelik met hulle,” sê hy. “Want die mense wat die moeilikste is om lief te hê het eintlik liefde die meeste nodig.” ■