Bernice West
Dié debuutalbum is eindelik hier
NET GELEEN
Bernice (19), wat verlede jaar as die naaswenner van die eerste seisoen van Emo Adams se talentsoekreeks, Maak my famous, op kykNET aangewys is, het onlangs haar debuutalbum, Net geleen, uitgereik.
Die talentvolle tiener het 13 van die 14 snitte self geskryf. Moenie ’n spesifieke genre verwag nie, sê dié nuweling oor die liedjiesamestelling op die album.
“Dit is soos ’n lucky packet: Jy weet nie wat jy gaan kry as jy jou hand daarin steek nie. Elke liedjie is anders en onvoorspelbaar, maar dit is wel ’n versameling herinneringe uit my grootwordjare. Ek speel baie met emosies in die liedjies.”
Die algemene musikale gevoel is wel een waar moderne pop en rock mekaar ontmoet, met folk-invloede wat plekplek deurslaan.
Veral in die liedjie “Beset” kom ondertone van klassieke rock sterk in die koorgedeeltes voor. Dié liedjie is ook een van haar gunstelinge, sê Bernice. “Almal kom die een of ander tyd op ’n plek waar hulle hunker na iemand om mee te praat. Die liedjie wil dan weet hoeveel keer jóú lyn beset was wanneer iemand jou wou bel.”
Alles wat sy het, is net aan haar geleen, verduidelik sy die titel van die album. “Ek is nie in staat om iets uit my eie te doen nie; alles is ’n geskenk van Bo.”
FAMILIEGEDOENTE
Haar ouer broer, Renier West (23), sing saam met haar in die snit “Eenvoud”. Hy is ook die liriekskrywer en kitaarspeler van die alternatiewe folkgroep Rooksein.
“Ek en my boetie het soveel gedeelde musiekwortels waar ons as kinders by die huis of in die kerk saamgesing het dat dit vir my belangrik was dat hy iets op die album saam met my doen.”
Die eerste twee liedjies op die album is reeds as enkelsnitte uitgereik en was onmiddellik gewild onder die publiek.
Die musiekvideo van “Sonop-blom” het sedert Maart meer as 1,5 miljoen kykslae op YouTube gekry, en “Die hart” het binne twee maande amper 500 000 kykslae opgelewer.
Albei liedjies het ook reeds die
“lucky packet”.
MUSIEK no. 1-plek op Apple Music se Afrikaanse enkelsnitlys bereik.
HAAR PAD NA DIE VERHOOG
Bernice het op Swartruggens in Noordwes grootgeword. Haar pa, Gert, is die pastoor in die AGS-kerk en haar ma, Estine, die klavierspeler en voorsanger.
Haar laerskoolopleiding het sy aan die Swartruggens Gekombineerde Skool ontvang, waarna sy in 2015 met haar gr. 8-jaar aan die Hoërskool Rustenburg begin het.
“Op skool het ek sport soos onderwaterhokkie beproef, maar nou nie eintlik uitgeblink nie,” vertel sy. “Ek is maar ’n kultuurmens en was onder meer een van die soliste van die skoolkoor.”
Bernice het verlede jaar gematrikuleer en woon nou saam met Renier in Pretoria terwyl sy haar voltyds op haar musiekloopbaan toespits. Sy het geen formele musiekopleiding nie, maar het haarself leer klavier en ukulele speel, vertel sy.
“Ek wou aanvanklik eintlik ná skool drama gaan studeer het met sang as ’n bydingetjie, maar toe gebeur Maak my famous. Die lewe het ’n weird manier van werk. Dit was Liewe Jesus wat op sy manier gesê het jy moet gaan sing.”
Nou pryk haar eerste album op die winkelrakke. ■
BOEKE
Rika Cloete