McConnell: Doring in Biden se vlees?
Die Republikein Mitch McConnell krap al jare die Demokrate se planne deurmekaar. Gaan hy sy ‘vriend’ Biden kelder?
SY POLITIEKE teenstanders noem hom sinies en geslepe. Onder sy vele onvleiende byname is “Moscow Mitch”, “Darth Vader” en “The Grim Reaper”. En g’n wonder nie, want as die langs dienende Republikeinse senaatleier pootjie Mitch McConnell (78), van Kentucky, al dekades lank progressiewe beleidsdrome.
Hillary Clinton, Barack Obama, Nancy Pelosi, die aangewese Amerikaanse president, Joe Biden . . . Al wat ’n prominente Demokraat is, het al McConnellmoleste gehad.
Charismaties is hy allermins, maar strategies is hy – en uitgeslape. Dis kenmerke wat hom die afgelope vier jaar goed te staan gekom het as oudpres. Donald Trump se belangrikste luitenant.
Maar terwyl Trump wilde bewerings oor verkiesingsbedrog twiet, glimlag McConnell breed. Want Kentucky se kiesers het hom pas vir ’n sewende termyn na die senaat gestuur. Dus, wanneer Trump op 20 Januarie 2021 die Withuis ontruim, sal McConnell as moontlike meerderheidsleier in die senaat die magtigste Republikein in Amerika wees.
En hy kan ’n doring in die vlees vir Biden wees – of dit nou gaan oor covid, bekostigbare gesondheidsorg of swaarder belasting vir die rykes.
WIE IS MITCH McCONNELL?
In dié tyd van die coronaviruskrisis is dit ironies dat Addison Mitchell McConnell jr. as kind in die 1940’s moes veg om teen ’n ander gevreesde siekte te oorleef: polio.
Die klein geboude McConnell, gebore in die deelstaat Alabama, was as kleuter byna ’n invalide nadat sy linkerbeen erg deur polio verswak is. Met sy pa, Addison, in die Tweede Wêreldoorlog betrokke, was dit sy ma, Julia, wat hom ’n streng oefenprogram laat volg het.
Hy was vier jaar oud toe hy die eerste keer sonder ’n beenstut kon loop en Julia vir hom sy eerste paar skoene gekoop het. McConnell het al vertel sy stryd teen polio het hom die dryfkrag en fokus gegee om ’n gedugte politikus te wees.
In sy tienerjare het die gesin na Louisville, Kentucky, verhuis. Ná skool het hy hom as prokureur gekwalifiseer en vir die Amerikaanse justisiedepartement gaan werk.
In 1977 is hy verkies tot ’n pos wat ooreenstem met dié van burgemeester van die Louisville-streek. Om sy eerste politieke sukses te vier, en ter ere van sy ma, het hy vir hom nuwe skoene gekoop.
McConnell het al vertel dat hy as student met ontsag vervul is deur die burgerregteleier Martin Luther King jr. se “I Have a Dream”-toespraak. As jong Republikein het hy progressief oorgekom, maar dit het gaandeweg verander.
Volgens John Yarmuth, ’n Louisvillekongreslid, het hy “nooit enige kernbeginsels gehad nie”.
In 1980 is hy ná 12 jaar en gerugte van ontrouheid van Sherrill Redmon, ’n geskiedkundige, geskei. ’n Werkvriend van Sherrill het geskryf McConnell se veranderende politieke opvattings het moont
lik daartoe bygedra. Hul drie dogters verskil polities drasties van hul pa. Sy jongste, Porter, is selfs ’n progressiewe aktivis teen Wall Street se “roofsugtige ekonomiese mag”.
In 1984 het Kentucky se kiesers hom die eerste keer senaat toe gestuur.
DIE SKATRYK TWEEDE VROU
McConnell is al 27 jaar met Trump se vervoerminister, Elaine Chao (67), getroud. Hulle is een van Amerika se rykste politieke magspare, al probeer McConnell hom as “doodgewoon” voorhou.
Elaine het as kind van Taiwan na Amerika geëmigreer. Haar pa, die skeepsmagnaat James Chao, stigter van die Foremost Group in New York, het noue sakebande met magtige Chinese staatsamptenare.
Elaine was onder meer ’n direkteur van Rupert Murdoch se News Corp en ’n arbeidsminister in George W. Bush se kabinet. Haar suster Angela is getroud met Jim Breyer, ’n waagkapitaalmiljardêr en direksielid van die uiters welvarende Blackstone Group, wat McConnell se politieke veldtogte finansier.
McConnell bestempel sy vrou as sy “sielsgenoot”. Maar kritici lug ook vrae oor haar aanstelling, glo op haar man se aandrang, in Trump se kabinet in 2017.
Die Chao-familie se skeepsmaatskappy besit aansienlike belange in seevervoer tussen Amerika en China. McConnell ontken daar is botsende belange tussen sy vrou se pos as vervoerminister en haar familie se sakebedrywighede.
Toe Elaine se ma dood is, het die egpaar $25 miljoen van haar familie ontvang. En sy is minder subtiel oor haar rykdom as haar man. Elaine rits graag in limousines rond. En as arbeidsminister onder Bush het sy iemand aangestel om haar handsak te dra.
HY EN OBAMA
In 2010 het McConnell verklaar die Republikeinse Party se hoofdoelwit is dat Obama net een ampstermyn in die Withuis deurbring.
In daardie doel het hy misluk. Maar as minderheidsleier in die senaat van 2006 tot 2014 het McConnell ’n rekordgetal Demokratiese wetsontwerpe en belangrike aanstellings gedwarsboom – ook talle van Obama s’n. Prof. Al Cross, ’n ontleder verbonde aan die Universiteit van Kentucky, skryf: “McConnell se koukus vertrou hom. Toe hy in Obama
iemand bespeur wat gematigde Demokrate langdurige oorheersing in die Amerikaanse Kongres kon besorg, het hy Obamacare begin gebruik om Republikeinse kiesers te mobiliseer om die senaat te wen.”
En toe die Republikeine die senaat in 2014 oorneem, het McConnell as meerderheidsleier gesorg dat baie progressiewe wetsontwerpe nooit verder as sy eie snippermandjie vorder nie.
Die afgelope vier jaar het hy ook kliphard gewerk om te sorg dat Trump se konserwatiewe keuses vir die federale hooggeregshof goedgekeur word, soos dié van Amy Barrett net dae voor vanjaar se presidentsverkiesing.
Barrett, omstrede weens haar lidmaatskap van ’n ultrakonserwatiewe kerk en haar teenkanting teen wettige aborsie, se aanstelling is lewenslank. Sy kan dus regspleging in Amerika dekades lank na die konserwatiewe kant help swaai.
HY EN TRUMP
“In die meer as 40 jaar wat ek McConnell dophou, het hy blykbaar geen groot doelwitte gehad nie buiten om mag te bekom en te behou,” skryf Cross.
“Die swygsame McConnell en die spraaksame Trump kan kwalik meer verskil, maar hulle het een ding met mekaar gemeen: magsug.”
Volgens Cross is albei ook waaghalsig en vermetel. “Maar terwyl Trump dikwels sy mag roekeloos beoefen, is McConnell se 36 jaar in die senaat op berekende risiko geskoei.”
McConnell se opgang, sê Cross, is te danke aan hoe hy veldtogte finansier deur bande met ryk sakelui te smee.
HY EN BIDEN
In Washington se politieke binnekringe is daar ’n gevoel dat McConnell dalk “minder naar sal wees” met Biden as met Obama. Biden en McConnell, wat op 78 ewe oud is, het as jare lange teenstanders in die senaat ’n sekere respek vir mekaar ontwikkel, hoewel hulle nie op persoonlike vlak oor die weg kom nie.
Strategies kon hulle al daarin slaag om oor sekere kwessies ’n middeweg te vind, soos in 2010 toe hulle saamgewerk het om ’n groot belastingooreenkoms te bewerkstellig. In 2013 het die twee ook sonder wete van hul onderskeie partystrukture vergader oor hoe Amerika die “fiskale afgrond” van destyds kon vermy.
McConnell het ook in 2015 die begrafnis bygewoon van Biden se seun Beau, wat weens breinkanker dood is. En toe Biden teen die einde van die Obamaadministrasie die senaat groet, het McConnell gesê hy was “’n goeie vriend” en “’n vertroude vennoot”.
Was dit net die praatjies van ’n ou politieke jakkals of sal McConnell minder van ’n doring in Biden se vlees wees as wat hy in Obama s’n was?
Die tyd sal gou leer. Die aangewese pres. Biden het gesê hy wil spoedig na die Republikeine uitreik: “Ons moet uitpluis hoe ons vorentoe gaan beweeg. Daar’s eintlik baie waaroor ons saamstem.”
Hoe McConnell daaroor voel, kan grootliks bepaal hoe interessant die Amerikaanse nasionale politiek in 2021 sal wees. ■