Maluma vat die wêreld en binnekort die silwerskerm oor met sy musiek!
GELD SOOS BOSSIES
Maluma (26) verdien miljoene met sy musiek. Die Colombiaanse sanger maak amper R10 miljoen met elke toer wat hy doen, en musieksterre val oor hul voete om met hom saam te werk. Mense soos Shakira, The Weeknd, Jennifer Lopez . . . noem maar op! Verskeie van sy liedjies, soos die gewilde “Chantaje”, het trefferstatus bereik, en hy het al ’n Latin Grammy agter sy naam.
IETS IN DIE WATER
Hy het grootgeword in die Colombiaanse stad Medellín, nes die
“Mi gente”-superster J Balvin. “Daar is baie talent in Medellín. Ons hou van musiek en sport,” sê Maluma. Hy het op 15 sy deurbraak gemaak nadat hy saam met ’n pel die liedjie “No quiero” gekomponeer het. ’n Jaar later het sy oom Juan Parra vir hom as verjaardaggeskenk tyd in ’n musiekateljee gereël sodat hy dit kon opneem. Sedertdien skiet sy ster behoorlik die hoogte in. En hy is deesdae sommer ook ’n akteur. Hy gaan volgende jaar saam met Jennifer Lopez en Owen Wilson in die romantiese komedie Marry Me te sien wees.
SOKKERDROME SY HARTSMENSE
Sy regte naam is Juan Luis Londoño Arias. Sy verhoognaam, Maluma, is deur die name van sy ouers, Luis en Marlli Arias, en ousus, Manuela, geïnspireer. “Die eerste letters van my ma se naam is Ma, my pa s’n is Lu en my suster s’n Ma,” sê hy. “Ek het op 14 my eerste tatoe op my been gekry. Dit sê Maluma. Ek is ’n gesinsmens, en toe ek ’n naam vir my loopbaan moes kies, het ek dít gekies; ek wou my gesin altyd by my hê.”
HALLO, KENDALL!
Hy het ’n groot crush op die Keeping Up with the Kardashians-ster Kendall Jenner gehad. “Sy kon dit beslis sien die dag toe ek haar ontmoet het,” vertel hy. Dit was op die stel van ’n Calvin Klein-advertensieveldtog wat hulle saam geskiet het. Hy was ’n bol senuwees toe hy Kendall gewaar. “Ek is seker daarvan sy het dit opgemerk,” vertel hy.