PONS STREK VER
Alkohol kan onthaalkoste die hoogte laat inskiet. Jou gaste sal verskillende voorkeure hê wat jy graag in ag wil neem, maar om in almal se smaak te voorsien gaan beslis ’n gat in jou sak brand.
Oorweeg dus ’n bekostigbare partytjieliefling: pons. Jy kan twee of drie groot bakke pons maak – party alkoholies en party alkoholvry. Jy sal net ’n paar bottels drank en nog ’n paar bestanddele daarvoor nodig hê, wat makliker is as om wyn, hardehout, bier én niealkoholiese drankies aan te skaf.
Laat weet jou gaste wanneer jy hulle nooi daar sal pons wees, maar hulle is welkom om hul eie drankies te bring na smaak.
MOOI HERINNERINGS IS DIE FOKUS
Doen baie moeite met daardie aspekte van jou partytjie wat nie veel kos nie. As jy byvoorbeeld van jou studentemaats nooi, kan jy ’n speellys met musiek uit daardie jare saamstel.
Jy kan buitelugspeletjies aanbied asook bordspeletjies, raaispeletjies of karaoke vir pret binne. En om die kinders besig te hou kan jy ’n “fliekteater” skep, kompleet met ’n stasie vir springmielies en lekkers.
Span beligting in om atmosfeer te skep. Lampe, lanterns, kerse en liggiestringe dra baie by tot die partytjiestemming.
Ou flesse en bekostigbare feetjieliggies is ideaal daarvoor.
KYK WAT JY SELF KAN DOEN
Laat jou kreatiwiteit blom wanneer jy met vakansie is en die tyd het. Ons is versot op hierdie Kersboomidee. Dit kos byna niks nie en kan selfs tot ’n gesprek lei!
BAIE BOEKE
Gebruik al die boeke wat jy klaar gelees en weggepak het, en pak ’n boom daarmee. Stapel dit van groot tot klein op ’n platform, rond dit af met ’n kryt-ster teen die muur bo dit en siedaar! ■