Meer oor’ n versiening sen instandhouding s plan vir jou motor

JOU motor is een van jou grootste uitgawes. Paaiemente, brandstof, versekering, instandhouding . . . Soms voel die lys van dinge waarvoor jy moet opdok eindeloos. Diensplanne en versekering is belangrike produkte wat jou teen risiko’s en groot uitgawes beskerm, maar hulle kan van mekaar verskil. Kom ons kyk na ’n tipiese diens- en instandhoudingsplan en waarborg. Wat dek dit alles, en waar pas jou versekering in?

1 WATTER INSTANDHOUDINGSOPSIES?

Saam met jou nuwe ryding kan jy gewoonlik produkte koop wat die instandhouding van jou motor dek: diensplanne, instandhoudingsplanne en waarborge. Elke handelaar of motorvervaardiger se produk verskil; maak dus seker jy verstaan die fyn druk.

■ Diensplanne Dit dek die koste van onderdele en arbeid vir die vervaardiger se voorgeskrewe standaarddienste. Gewoonlik beteken dit dat alle vloeistowwe (rem- en koppelaarvloeistowwe, olie, ratkasolie, verkoelingsmiddels) en alle filters en vonkproppe vervang word.

Nuwe voertuie het dikwels ’n diensplan wat vir ’n getal dienste of kilometers geldig is, soos drie dienste en 45 000 km. Van jou word vereis om die diensplan te volg, byvoorbeeld om die voertuig elke 15 000 km te laat diens. Waarvoor betaal dit nie? Vir die herstel of vervang van onderdele soos remskoene, skokbrekers, die koppelaar of gloeilampies weens slytasie betaal jy self.

■ Instandhoudingsplanne Dit het gewoonlik al die voordele van die diensplan, maar sal ook die koste dek van enige onderdele wat weens normale slytasie vervang word, byvoorbeeld skokbrekers, ruitveërs, koppelaars en jou ratkas.

As jou motor reeds ’n diensplan het, kan jy dit gewoonlik laat opgradeer na ’n instandhoudingsplan mits jy die verskil betaal. Soos met diensplanne sal dit geld vir ’n spesifieke getal kilometers of tydperk, byvoorbeeld sewe jaar of 100 000 km.

2 HOE WERK WAARBORGE?

Waarborge is gewoonlik ingesluit in nuwe voertuie se koopprys. Dis ’n skriftelike onderneming deur die vervaardiger of handelaar dat die motorkomponente en onderdele standaard is en vir ’n spesifieke tydperk sal hou. Dit sluit gewoonlik die lugversorger, transmissie, elektriese komponente, die enjin, ratkas, sensors en brandstofstelsel in. Breek die onderdele binne die waarborgtydperk sonder jou of iemand anders se toedoen, word dit gratis vervang.

Onthou Jou voertuig moet deur ’n goedgekeurde diensverskaffer herstel word, en jy moet die voorgeskrewe diensplan nakom. Waarborge geld net vir ’n vasgestelde getal kilometers of tydperk. Verstryk dit, kan jy ’n uitgebreide waarborg van die vervaardiger koop. Wat dek dit nie? Slytasie en skade weens nalatigheid, en ongelukskade.

3 WAT DEK VERSEKERING?

Voertuigversekering dek nie jou gewone onderhoudsuitgawes nie. Dit betaal vir ongelukskade aan jou voertuig. Die hoeveelheid en tipe dekking wat jy benodig, hang af van die waarde van jou motor, hoe gereeld jy dit gebruik en wat jy kan bekostig.

Daar is drie hooftipes dekking: omvattend; derdeparty, brand en diefstal; en totale verlies, sê Serapelo Mofokeng, hoof van kliëntediens by MiWay. Omvattende dekking is gewoonlik die duurste – dit gee jou die wydste dekking.

■ Omvattend Dit dek diefstal, kaping, skadevergoeding weens ’n ongeluk, brand of ontploffing, en natuurrampe. Ook skade aan voertuigruite, aanspreeklikheid teenoor ander partye en opsetlike skade aan jou voertuig deur iemand anders.

Finansiële instellings vereis dat voertuie onderworpe aan ’n huurkooplening omvattend verseker word sodat hul belang daarin gedek is.

■ Derdeparty, brand en diefstal Dié dekking is beperk tot diefstal en brandverwante skade aan jou motor en skade aan ’n ander voertuig tydens ’n ongeluk wat jy veroorsaak. Jou motor word nie in die ongeluk gedek nie, net die derde party s’n. Mense met ouer motors, waarvan die waarde laag is, het dikwels net derdepartyversekering.

■ Totale verlies Dit dek die voertuig wanneer dit afgeskryf, gesteel of gekaap is en jy kry dit nie terug nie.