Vinette Ebrahim steel die kollig in die nuwe rolprent
Drama. Met Vinette Ebrahim, June van Merch en Quanita Adams. Regie: Amy Jephta. 13TGDV.
WAAROOR GAAN DIT?
Afrikaans se eerste Moslemfliek is ’n kardoesie vol warm en ryk lekkergoed vir die nageslag van almal wat Afrikaans ken en verstaan. Barakat nooi jou in ’n KaapsMaleise gesin se binnekamer in.
Die dood van hul pa het die Davidsgesin geruk. Party sal sê dis ’n disfunksionele gesin, maar myns insiens is dit ’n doodgewone gesinsverhaal, want ons almal ken die storie van verlies en hardnekkige en soms sinnelose spanning tussen broers.
Barakat bring die lens in fokus op ’n gesin wat tussen tale bid, kos maak en asemhaal. Die geluide van Arabies en Afrikaans wys ’n refrein van SuidAfrikaans-wees wat tot dusver baie in die skadu van die Afrikaanse rolprentmilieu was.
Die gesinsmatriarg Aisha Davids (Vinette Ebrahim) is ná haar man se dood weer verlief en besluit om ja te sê toe die nuwe liefde in haar lewe haar vra om te trou. Sy besluit om haar vier seuns oor Eid-oel-Fiter – die einde van die heilige maand van Ramadaan – in te lig oor dié nuwe ontwikkeling in haar lewe.
Die enigste vlieg in die salf is dat haar twee oudstes ná hul pa se dood nie ooghare vir mekaar het nie. Dis net skindertonge wat die seuns toe eindelik almal onder valse voorwendsels onder een dak bymekaarkry toe dié bom bars.
IS DIT DIE KYK WERD?
Hierdie karaktergedrewe draaiboek, gepaard met sy uitmuntende akteurs – groot name soos Quanita Adams, Joey Rasdien en June van Merch – ontroer met geloofwaardige toneelspel. Vinette skitter in die hoofrol en verdien applous vir die diepte waarmee sy dié rol takel.
“Barakah” beteken “seën” in Arabies, en in die Kaaps-Maleise kultuur is ’n barakat ’n papiersak gevul met koeke, vrugte en lekkergoed wat deur vriende en bure gedeel word. In hierdie geval is Barakat ’n dapper gesinsfliek in die tyd waarin rolprente uit die puin moet terugveg ná ’n verwoestende pandemie. Al is die teks plek-plek voorspelbaar, is dit ’n fliek wat jou op ’n reis van selfondersoek neem en kykers deur ’n maalkolk van emosies begelei en jou laat lag, huil en van glimlag stil laat raak. Dié Barakat is meer as ’n wegneempakkie; dit is ’n seën.