HOEKOM WORD ENTSTOF SOMS WEGGEGOOI?
Tot dusver het Suid-Afrika slegs sowat 2,3% van die bevolking volledig ingeënt – sowat 1,36 miljoen mense. En volgens Barry is daar baie inhaalwerk om te doen.
Maar hoe strook dit met berigte oor besendings entstowwe wat aan die einde van die dag weggesmyt word omdat dit “nie hou nie”?
Hannelie verduidelik daar sal altyd ’n sekere persentasie entstofvermorsing wees – en dat dit gewoonlik in belang van pasiënte se veiligheid is.
Sy verduidelik entstowwe word op verskillende tegnologieë gegrond, met verskillende eienskappe, en gevolglik het elke entstof sy eie bergingsvereistes.
Die tydperk wat dit teen ’n sekere temperatuur gestoor kan word, verskil ook van entstof tot entstof.
“Entstowwe wat aan ongewenste temperature blootgestel word, sal aan ’n gebrek aan doeltreffendheid ly, en dit kan tot nadelige gebeure ná inenting lei,” sê sy.
As daar enige afwyking van die bergingsvereistes was, moet entstowwe weggegooi word vir die veiligheid van pasiënte.
Maar die kenners sê een van die maniere om vermorsing te vermy, is om instapinentings toe te laat as gevolg van die onlangse koers van mense wat nie opgedaag het nie.
Volgens Dis-Chem het sowat 70% van mense wat geregistreer het, nie vir hul inentings opgedaag nie. Instapinentings is nou in Gauteng vir mense ouer as 50 geopen, terwyl inentings vir mense tussen 35 en 49 op 1 Augustus begin.
Jy kan vir ’n afspraak by jou plaaslike apteek registreer as jy ver is van die plek wat die regering aan jou toeken.
Om op die departement van gesondheid se Electronic Vaccination Data System te registreer, het jy toegang tot die internet, jou ID- of paspoortnommer, kontakinligting en werk- of huisadres nodig.
Hannelie sê daar sal geen entstofvermorsing wees as jy verkies om liewer na ’n sentrum naby aan jou te gaan pleks van jou geregistreerde plek nie omdat die stelsel jou ID-nommer optel.
Instapinentings is nou ook oop ingeval jy jou eerste afspraak misgeloop het.
SUID-AFRIKA HET TOT DUSVER SLEGS SOWAT 2,3% VAN DIE BEVOLKING VOLLEDIG INGEËNT, EN DAAR IS BAIE INHAALWERK OM TE DOEN
Prof. Barry Schoub, viroloog en hoof van die ministeriële advieskomitee oor covid-19.