Artikel noop leser om mense rondom haar te help
WAT ’n fenomenale engel en merkwaardige vrou is Zohra Sooliman in “Agter elke man” (25 Augustus). Dit het my hartsnare geroer, en met tye moes ek die trane van hartseer in toom probeer hou.
Imtiaz en Zohra Sooliman het nie ’n oomblik getwyfel oor hul lewenstaak om duisende onder hul vlerke te neem nie. Zohra het ook in eie reg haar merk gemaak en ’n onskatbare bydrae gelewer tot die administrasie van Gift of the Givers se projekte in diverse gemeenskappe van oor Suid-Afrika en in die buiteland.
Om waarlik ’n diens te kan lewer, moet jy iets byvoeg wat nié aan geld gemeet kan word nie – en dit is opregtheid en integriteit. Dié twee mense beskik waarlik oor hierdie edele eienskappe. Uit die onderhoud kan ek aflei watter wonderlike en liefdevolle verhouding daar ook tussen hulle bestaan. Hulle klink boonop na deernisvolle en liefdevolle ouers vir hul kinders.
Baie, baie dankie vir julle hulpverleningswerk in soveel gemeenskappe, ongeag ras, geloof of kultuur. Bid sonder ophou beteken beslis nié om heeldag op jou knieë te staan nie, maar om jou hande uit te steek, die wêreld in te gaan en te help waar jy kan. Julle dien jul naaste met oorgawe en volhoubaarheid.
Hierdie artikel het my geïnspireer om die oorvloed in my kos- en klerekaste na ’n familie van 11 mense in ’n tweevertrekhuisie te neem en met hulle te deel. Ek is nou danksy die Soolimans diep onder die besef dat die lewe ons niks skuld nie – behalwe die geleentheid om goed te doen aan ander.
Vreugdevolle groete ANTOINETTE SCHOEMAN