MOET EK EERDER ANDER WERK SOEK?
Ek is in my 50’s en werk vir ’n man by wie ek die laaste ruk bly. Sy kantore is by sy huis.
Hoewel ek onlangs weer my eie blyplek gekry het, verg my werk soveel aandag dat ek steeds by hom oorslaap.
Ons stry baie oor sy soort vriende en sy drankmisbruik. My dogter en my kleinkind weier om vir my te kom kuier. Sy oog dwaal te maklik.
Ek is ’n eiendomsagent van beroep, maar ek doen hierdie ekstra werk om my finansiële posisie te versterk.
Tog is dit so sleg vir my dat ek voorheen al bedank het, maar dan smeek hy my om te bly en is hy rustiger vir ’n rukkie.
Wat moet ek doen? Bedank ek permanent by hom en leef met net die kommissie wat ek uit huisverkope kry, of bly ek by hom aan ter wille van finansiele gemoedsrus?
As ek bedank, kan ek darem weer my dogter en my kleinkind sien.
Jy is in ’n baie ongesonde situasie wat jou werk én emosionele gesondheid betref. Kom ons kyk of ons nie ’n goue middeweg met net voordele kan vind nie. Maak so:
Jou werk: Jy stel ’n kontrak op vir jou pos by hierdie man. Die departement van arbeid vereis dit en hulle het voorbeelde wat aanlyn beskikbaar is en as riglyn vir jou kan dien. Die belangrikste ding is dat dit onder meer die volgende inligting moet bevat:
■ Werkure per dag;
■ Oortydbetaling;
■ Voordele, soos ’n prestasiebonus en/of jaarlikse bonus;
■ Verlof en siekteverlof;
■ Posbeskrywing.
Jy kan ook ’n arbeidskenner se hulp hiermee vra.
Hou dan ’n vergadering met jou werkgewer hieroor. Jy stipuleer duidelik jy gaan bedank as daar nie ’n wettige kontrak onderteken word nie. Hy kan probleme verwag as ’n verteenwoordiger van die departement van arbeid ’n oudit op sy sakeonderneming doen en daar is nie ’n kontrak nie.
Jou verhouding: Is hierdie man jou kêrel ook? As dit so is, kort julle baie werk aan jul verhouding, saam met ’n berader. Jul verhouding is wanfunksioneel en dit het beslis ’n uitwerking op jou emosionele welstand.
As hy nie jou kêrel is nie, stel ek voor jy trek uit en gaan woon in die blyplek wat jy aangeskaf het.
Jou finansies: Dit is goed om in hierdie tyd deeglik bewus te wees van jou finansiële welstand, veral as jy op jou eie verantwoordelik is vir jou inkomste.
Moenie die finansiële opdraande vrees wat jy sal beleef as jy net een inkomste het nie.
In jou geval behoort dit kortstondig te wees, want jy klink vir my na ’n doelgerigte, harde werker en ek glo jy sal óf skouer aan die wiel sit vir meer huisverkope óf baie gou ’n ander tweede inkomste genereer.
Vertrou jou dogter se instink oor hierdie man. Ek is bly dat jy haar besluit respekteer. Sy is ’n vrou en ma wat oplet wat om haar aangaan. Dit kan net van jou opvoeding af kom, welgedaan daarmee.