VIDEOSPELETJIE

Ons videospeletjieliefhebber GARETH SEILER het een van die grootste speletjies van die jaar getoets – en hy is beïndruk!

STARFIELD XBOX SERIES X/S, PC NOU BESKIKBAAR.

Die maatskappy wat Starfield gemaak het, is vir die suksesvolste videospeletjie van alle tye verantwoordelik.

Dis moeilik om te glo, maar

Skyrim is tot vandag toe steeds een van die speletjies wat daagliks die meeste gespeel word. En ná daardie epiese fantasieverhaal met sy drake en towenaars het Bethesda hulself oortref met die meer grootmensagtige

Fallout-reeks – gewild, lekker om te speel en vindingryk.

Daarom het almal verwag hul jongste speletjie gaan misluk: Hoe is dit moontlik om so naby aan die son te vlieg sonder om te verbrand?

Almal was verkeerd! Starfield is groot. Nee, dis massief.

Daar is meer as 1 000 planete om te verken. Jy het honderde karakteropsies, ruimteskiponderdele, geboue, stede, selfs lewensvorme . . . Wanneer ek sê Starfield is dosyne speletjies in een, dan probeer ek eintlik kalm bly.

Wat is dit nou eintlik? Jy kan een van verskeie rolle in hierdie groot sterrestelsel aanneem en take uitvoer waarmee jy geld of gunste kan wen. Jy besluit of jy goed of sleg is, en jy bou so jou ruimteskip en jou kring van kennisse uit om jou invloed en mag meer (of minder) te maak. Terselfdertyd speel ’n oorkoepelende storie af met wonderlike kinkels en verrassings. Jy kan die hoofstorie afhandel of jy kan jou in die oop heelal begewe met sy ontdekkings en onthullings en eindelose nuwe horisonne.

Starfield is Bethesda se beste speletjie – en dit gaan die groot rol wat Skyrim in my lewe gespeel het, oorneem.