Nuut op die rakke
’n Naelbyter met twee eindes
SALEMSTRAAT Deur ERLA DIEDERICKS Lapa,
R325*
Erla Diedericks het twee nuwe boeke op die rak, ’n kortverhaalbundel, Die geheime klippieklub,
wat by Viva verskyn het, en die domestic noir, Salemstraat.
Die term “domestic noir” is ’n onderafdeling van misdaadfiksie waar die verhaal hoofsaaklik in huise en werkplekke plaasvind, met die breë feministiese siening dat die huishoudelike sfeer ’n uitdagende en soms gevaarlike plek kan wees.
Erla sê oor Salemstraat: “Dis vir my meer vreesaanjaend as my vorige twee rillers, want dié keer is dit nie die een of ander misdadiger of agtervolger nie, maar is die boosheid aanwesig en aan die broei in die bure – gewone mense net soos jy.”
Ek vra haar wat vir haar die aantreklikste en die vreemdste is van ’n paar van haar hoofkarakters.
Emilee “Sy was vir my ’n uiters interessante karakter omdat sy aanvanklik vir my ’n geslote boek was. Sy het al haar geheime weggesteek, en ek was tot byna hier reg teen die einde nie seker oor wat haar motivering was om haar man dood te skiet nie.”
ML “Hy is losweg gegrond op my eksman – en ML is dan ook sy voorletters. In my eerste riller, Dominique, en in hierdie boek maak ek my eksman dood – in die vorm van ’n ander karakter, natuurlik – maar ek dink ek is nou eindelik tevrede. Hy is dood, vergete en vergewe (op papier).”
Natasja “Sy is ’n sexy Rus en ML se minnares. Ek wou so ’n bietjie van die eksotiese en volksvreemde inbring, want ek geniet altyd daardie iets of iemand wat anders is. Nie jou gewone sout-en-peperpotjie van die plaas af nie. Natasja kom uit ’n generasie Russiese hekse, maar al wat sy op die oog af kan betower, is ander vroue se mans.”
Riaan “Ek is nou al byna 30 jaar ’n joernalis, en Riaan, in die boek ’n misdaadjoernalis, is ’n mengsel van al die manlike skrywers en joernaliste wat ek al oor die jare leer ken het. Hy rook dagga, drink baie koppies koffie, is geheel en al angsbevange oor verhoudings, maar kan tog ook nie die vroulike geslag uitlos nie. ’n Liewe maar loskopsiel.”
Ann “Sy is ’n forensiese psigiater wat in my vorige boek, Die bewonderaar, ’n taamlike groot rol gespeel het as die hoofkarakter se psigiater. Sy was só gewild en het soveel reaksie by lesers ontlok, dat ek besluit het om haar weer in Salemstraat te gebruik. Sy is dan ook een van die hoofkarakters in my volgende spanningsroman wat aanstaande jaar op die rakke gaan wees.
“Wat vir my die lekkerste van die boek was, was die einde. Daar is sommer twee eindes. En die een is meer onverwags as die ander!”