LIEFDE SOOS DIE SAND VAN DIE WOESTYN
Dis mos nou so Namibies soos kan kom! CHANIQUE RABE, wat in 2021 haar mededingers in die Mej. Supranasionaal-kroon uitgestof het, en haar jarelange kêrel KYLE
HONEYBORNE het onlangs in die Namib getrou.
Sowat honderd gaste het die paartjie se spesiale oomblik in die wêreld se oudste woestyn gedeel.
Die Namibies gebore skoonheid se bruidegom is van Pretoria, maar hulle het mekaar ontmoet in Swakopmund, die historiese woestyndorp aan die Namibiese kus. Daarom het ’n huwelikseremonie tussen die omringende duine vir hulle nommerpas gevoel.
“Ons het net soveel ongelooflike herinneringe hier. Ons was so ’n bietjie senuweeagtig oor die wind en sand wat dalk kan waai, maar dit het fantasties uitgedraai,” sê Chanique.
Sy het soos ’n droom gelyk in haar trourok wat deur Anel Botha ontwerp is. “Sy het elke liewe droom oortref wat ek oor ’n trourok gehad het. Ek het soos ’n feëprinses gevoel. Selfs Kyle het gesê dis regtig die mooiste rok wat hy al gesien het,” sê Chanique.
Die paartjie se trouringe is ook spesiaal vir hulle ontwerp deur die juwelier Carlo Hayes.
Om mekaar eindelik man en vrou te kon noem, was vir hulle baie spesiaal. “Ons sien uit na ons volgende hoofstuk as getroudes, om ons eie tradisies te bou en saam herinneringe te maak.”
Die egpaar het drie weke gelede in hul huis in Pretoria ingetrek. Hul wittebrood lê nog voor, maar Kyle swyg nog soos die eeue oue duine van die Namib oor hul bestemming.
“Ek het geen idee waarheen ons gaan nie. Ons vertrek oor drie weke en ek weet net ek moet lekker swembroeke inpak. Ek kan nie wag nie!”