BRITNEY BLY SPEEL OP DIE AFGROND
HAAR sagte plek vir stout seuns is g’n geheim nie – en daarom is BRITNEY
SPEARS se nuwe liefde alsbehalwe ’n verrassing. Terwyl haar huwelik met Sam Asghari (29) verbrokkel, vind Britney (41) troos in die arms van haar voormalige huishouer, PAUL RICHARD SOLIZ (37) – ’n man met ’n misdaadgeskiedenis. Hierdie geskiedenis sluit in aanklagte van bestuur sonder ’n rybewys, besit van ’n middel met die doel om te verkoop, die onwettige besit van ’n vuurwapen, rusverstoring en kinderbedreiging.
Paul is in 2022 aangestel om Britney se toilette en vloere skoon te maak en vullisverwydering te doen, maar toe weer afgedank toe sy probleme met die gereg bekend word.
Nou wil gerugte dit egter hê dat Sam van Britney wil skei juis omdat hy uitgevind het sy het hom met ’n werknemer verkul.
’n Bron in die binnekring het aan Us Weekly vertel hoe Sam op beelde van Britney en Paul afgekom het wat met ’n sekuriteitskamera opgeneem is.
“Hy is afgedank toe Britney se span uitvind hulle slaap saam, maar het weer op die toneel verskyn,” het die bron onthul.
Slegs ’n week ná die dagvaarding gekom het, is Britney en Paul by verskeie geleenthede saam gesien en het hulle saam rondgery.
Maar Britney het sedertdien die verhouding beëindig, het ’n bron aan die Daily Mail gesê.
“Hulle het ’n kort affair gehad nadat Sam Britney verlaat het, maar dit is verby. Britney het een of twee keer saam met hom uitgegaan, maar sy het nie op daardie tydstip van sy misdaadverlede geweet nie. Sy het nie meer enige kontak met hom nie.”