15 Oktober is Tuindag

Is jou blomkroon reg? Hou op skoffel en spit en begin beplan(t), want dis tyd vir ’n partytjie in jou tuin. Dit kan ’n luilekker middagete, ’n feestelike piekniek, ’n familiebraai, skemerkelkies saam met vriende, of tee saam met jou beste vriend wees. Vir idees en inspirasie gaan na tuindag.co.za

VOOR die vieringe begin, maak seker jy het jou blomkroon op – dis die Tuindag-simbool. Deel dan jou foto’s met ons. Gebruik die hutsmerk #GardenDaySA en volg ons by @GardenDaySA op sosiale netwerke. Hier is Marciel se wenke vir ’n fantastiese tuinpiekniek.

1 Kry jou piekniekplek reg

Laat die gras sny, lei jou plante nat en skep ’n skadukol met ’n helder sambreel as dit te warm is – dit lyk dan sommer feestelik.

2 Beplan die kos

Toebroodjies is altyd ’n maklike uitweg. Hol ’n waatlemoen uit om ’n natuurlike slaaibak te vorm en maak hom propvol met ’n heerlike koeskoes-, pasta- of aartappelslaai. Biltong en droëwors is ook maklik om te pak (en lekker). Brood en ander deli-kos maak die ete spesiaal sonder veel voorbereiding. Koue kaaskoekhappies of roomyshorinkies is heerlike koel nageregopsies.

3 Geniet!

Perfekte pieknieks en partytjies gaan oor die tyd wat ons saam met vriende en familie deurbring. As jou tuin groot genoeg is, pak ’n paar speletjies uit soos ’n Scrabble-bord of hou ’n sakresies.

4 Kombers en kussings

Komberse en kussings vir ’n tuinpiekniek is ’n moet. Kies iets wat waterdig is aan die onderkant en gooi sommer baie kussings uit. ’n Paar ekstra komberse is altyd ’n goeie idee vir as iemand dalk koud kry.

5 Kies jou mandjie

Jy kan nie ’n piekniek hou sonder ’n mandjie nie. Maar moet jou nie bekommer nie, jy hoef nie by die tradisionele grasmandjie te hou nie. Raak kreatief en kies enigiets waarvan jy hou – helderkleurige plastiek of selfs kartonbokse is mooi.