Mense en hul dinge
DIE JONGSTE NUUS UIT DIE GLANSWÊRELD
RIKUS DE BEER
Om ’n Wêreldbekerrugbywedstryd te kyk was al die afgelope 10 jaar op die Toks & Tjops-aanbieder se emmerskoplys.
“Al het ons teen Ierland verloor, was die gees en die hele gebeurtenis ongelooflik,” vertel Rikus. “Die Iere is lekker mense en het baie passie. Ná die tyd het hulle ons hande kom skud, ’n bier gedeel en hand om die lyf saam ‘Zombie’ gesing. ’n Ongelooflike ervaring.”
Dit was sy eerste keer in Parys. “Die stad is ongelooflik mooi met ontsettend baie kuns, kultuur en kos.
“Maar ek moet sê wat mense betref, verkies ek die gasvryheid van die SuidAfrikaners!”
Die radio- en televisieaanbieder en haar man, AVUKILE MABOMBO, asook ’n groep vriende is groot Springbok-ondersteuners en het die manne in groen-en-goud al die pad na Frankryk gevolg.
“My neef het ná 2019 gesê dat sy groot droom is om die Bokke oorsee te ondersteun, en ons het toe almal daarvan werk gemaak,” vertel Tracey. “Ons was uit ons vel en het meer as ’n jaar hieraan beplan.”
Vir party in die groep was dit die eerste keer dat hulle Frankryk besoek. “Vir ons almal was dit nog beter om dit saam met ’n groep vriende te doen. Dit het die gevoel van #StrongerTogether net nog meer eg laat voel.”
FRANCOIS VAN COKE
Om ’n Wêreldbekerrugbywedstryd in Frankryk te gaan kyk is ’n droom wat waar geword het, sê die rocker.
“Ek het in 1995 die Bokke teen Australië op Nuweland gesien, en ek was nou die eerste keer weer by ’n Wêreldbekerwedstryd,” sê Francois.
“Om so ’n groot wedstryd soos die Bokke teen Ierland in die Stade de France te sien was ongelooflik. Al die Iere wat ná die wedstryd ‘Zombie’ van The Cranberries uit volle bors sing, was regtig spesiaal om te hoor.”
Hy en sy vrou, LAUREN, was al voorheen in Parys en het destyds al die trekpleisters gesien. “Hierdie keer was ons basies 40 uur in die stad vir die rugby. Ons het darem ’n vinnige besoek aan die Eiffeltoring gemaak en baie vriende gesien,” sê Francois.
NATASHA JOUBERT
Die huidige Mej. Suid-Afrika beleef die Wêreldbekergees in die strate van Parys. Natasha word tans as ’n eregas by die Paryse Modeweek onthaal. Sy kuier saam met ’n rits bekendes en laat die koppe draai in haar stylvolle uitrustings. “Dis ’n voorreg om in die stad te wees wat die episentrum van mode is,” sê Natasha. “Dit is hoekom ek so opgewonde is om by ’n geleentheid te wees wat daaraan toegewy is om vroue te bemagtig en hul skoonheid van binne en buite ten toon te stel.”
HAMILTON WESSELS & VANES-MARI DU TOIT
Die grapjas-duo is twee maande lank in Frankryk en gee aan kykers ’n onvergeetlike rugbyreis in die kykNET-reeks In Frans, ja!. “Die atmosfeer hier is elektries!” laat Hamilton hoor. “Tussen ons en die Iere is dit moeilik om te sê wie die meeste ondersteuning in die land het. Ek praat meer Afrikaans in Frankryk as in Pretoria.”
Sy hoogtepunt tot dusver? “Ons is op die oomblik op ’n rugbybootreis in Italië saam met net rugbyondersteuners. Ons gesels meer rugby as Naas en Darren,” sê hy.