MY HUWELIK HET MISLUK, MAG EK AANBLY?

V Dit is net ’n kort vraag waarmee ek hulp nodig het: My huwelik het reeds misluk – is dit verkeerd van my om te vra om ’n eie kamer in die huis te hê? Ek kan nie skei en apart bly nie. My finansies laat dit nie toe nie. My eggenoot weier.

A Sommige mense kry dit reg om op goeie voet te bly wanneer hul verhouding of huwelik op ’n einde is. Hulle akkommodeer mekaar se onmiddellike behoeftes tot almal weer op die been is en met hul lewe kan aangaan. Dit sluit in om tydelik te help met verblyf, ensovoorts.

Maar dit is regtig die uitsondering op die reël, want huwelike wat beëindig word, is gewoonlik ’n morsige spulletjie en ontaard in ’n nagmerrie wat jare kan aanhou.

Jy noem nie wat presies dit is wat jou eggenoot jou weier nie – die kamer om in te woon of ’n egskeiding? Jy noem ook nie of julle kinders het nie. Ek veronderstel dit is ’n nee omdat jy net een kamer vra.

Ek raai jou aan om so gou moontlik werk te kry om jou finansieel sterker te maak. As jy reeds ’n werk het, kan jy dalk vir ’n salarisverhoging vra. Vat ’n kans daarmee.

As dit persoonlike skuld is wat jou rem, kan jy met die instansies onderhandel vir ’n aanpassing in jou maandelikse paaiemente. Dit gaan die tydperk van terugbetaal verleng, so wees versigtig.

Jy kan by die Regshulpraad aansoek doen vir ’n prokureur om jou gratis by te staan en sodoende jou uitgawes sommer baie sny. Universiteite se regsklinieke kan jou ook bystaan, as jy naby een woon.

Dit is nie ongewoon om te vra om aan te bly in ’n kamer nie – dit is dalk net nie so wys nie. Wat maak jy as jou eggenoot iemand wil nooi vir ete of koffie? Of ’n groot kuier saam met vriende wil hou?

Om te skei en steeds ’n huis te deel gaan baie problematies wees.

Begin om aan jouself te dink as ’n onafhanklike mens, en pas jou lewe daarvolgens aan.