HOE VOORKOM EK WANBETALINGS?

1 WERK JOU ADMIN BY

Weet wie jou kliënte is, kry hul ID-nommers en kontakbesonderhede.

Hou boek van alle dienste wat jy lewer en die datum daarvan. Onthou om jou fakture betyds uit te reik. Jou korrekte rekeningbesonderhede en ’n verwysingsnommer moet daarop wees.

As jy laat is, of die inligting foutief, het die kliënt verskoning om ook laat te wees.

As jy dit nie per e-pos doen nie en met ’n faktuurboek, maak seker dat jy die afskrif van die faktuur hou.

2 SIT OOREENKOMSTE OP SKRIF

Dit kan ’n eenvoudige kontrak wees, maar jy moet die betalingsvoorwaardes uitstip, byvoorbeeld betaling binne 30 dae nadat die rekening gestuur is.

Stip uit watter laatbetalingsboetes van toepassing sal wees, byvoorbeeld 5% vir elke agterstallige maand.

Vra iemand wat reeds vir ’n ruk “side hustle” watter voorwaardes hulle stel.

As dit ingewikkelde werk is en die vergoeding hoog, moet jy liewer ’n prokureur oor die kontrak raadpleeg.

3 VRA ’N DEPOSITO

As jy ’n produk verkoop, kan jy byvoorbeeld 50% van die bedrag vooraf vra. En as jy ’n diens lewer, vra dat die koste gedeeltelik of ten volle vooruit betaal word. As jy ’n goeie reputasie het, behoort jou kliënte nie om te gee nie.

4 MAAK BETALINGS GERIEFLIK

Kontantbetalings is deesdae seldsaam. Aanvaar dus elektroniese oorbetalings na jou bankrekening.

Jy kan ook kaartbetaaltoestelle koop of huur.

Dis maklik om te gebruik, maar vergelyk eers die verskillende fooie en kommissies – dit kan wissel van so 1,75% tot 4% per transaksie.

Kies die een met die laagste kommissie en fooie, goeie seinopvangs en wat die geld gou in jou rekening inbetaal.

Vergelyk jou eie bank se aanbod (dit is moontlik dat dit vinniger in jou rekening oorbetaal word) met ander opsies.

5 KRY HULP

Stel ’n assistent aan as jy sukkel met admin of ongemaklike oproepe om geld in te win. Sodoende gee jy aan ook iemand anders ’n ekstra inkomste.