TAYLOR SE NUWE ROMANSE
JA-NEE, TAYLOR
SWIFT weet beslis hoe om
’n vertoning te gee – of sy nou op die verhoog is of met haar jongste vryer spog.
Alle oë was op die sangeres toe sy onlangs gaan kyk het hoe TRAVIS KELCE, een van die grootste sterre van Amerikaanse voetbal, op die veld stamp en stoot.
Taylor (33) is onlangs in ’n privaat losie in Kansas City afgeneem saam met Travis se ma, Donna. Hy speel vir die
Kansas City Chiefs en sy het hom luidkeels ondersteun.
Volgens ’n bron het sy en die breker in Augustus saam begin uithang nadat hulle mekaar in New York ontmoet het. “Hulle leer mekaar eers net beter ken,” het die bron aan
Today gesê.
Tog het Taylor al in Junie
Travis se aandag probeer trek – en dit nogal van die verhoog af. Sy was in Kansas as deel van haar
Eras Tour.
Hy het gereageer: “Ek was teleurgesteld dat sy nie voor of ná haar vertonings praat nie omdat sy haar stem moet spaar vir die 44 liedjies wat sy sing.
“Ek was ’n bietjie seergemaak dat ek nie die kans gekry het om vir haar een van die armbande te gee wat ek vir haar gemaak het nie,” het Travis gesê op die podcast New Heights, wat hy saam met sy broer, Jason, aanbied
Taylor se aanhangers maak en ruil unieke armbande by haar konserte uit. Travis het gedink dit sou die perfekte verskoning vir ’n ontmoeting wees.
Vroeg in September wou hy egter nie uitpraat oor wat tussen hom en Taylor aangaan nie. “Ek gaan nie oor my persoonlike lewe praat nie,” het hy gesê.
Maar twee weke later is hulle saam gesien toe hulle by die stadion uitstap ná Travis se wedstryd en in sy kar klim vir ’n aand uit. Sy is ook by die partytjie ná die wedstryd saam met Travis afgeneem.
Travis het voorheen met die verslaggewer Kayla Nicole uitgegaan, en vir vyf jaar aan en af met die TV-persoonlikheid Maya Benberry. Hy het Maya in 2016 op sy afspraakprogram Catching Kelce ontmoet.
In ’n onderhoud met die Daily Mail het Maya vir Taylor ’n waarskuwing gestuur dat haar nuwe ou ’n narsistiese verneuker is. “Sekere eienskappe verander nie in ’n man nie. Ek voel Travis is ’n narsis. En narsiste verander nie.”
Net die tyd sal leer of Taylor haar aan die waarskuwing sal steur of met die nuwe romanse sal voortgaan. Een ding weet ons: Ons gaan goeie musiek hieruit kry.