BLOMKOOLKOEKIES
LEWER 6 KOEKIES / BEREIDING EN GAARMAAK: 45 MIN.
750 ml (3 k) blomkool, in blommetjies gebreek
5 ml (1 t) olyfolie
1 ui, fyngekap
5 ml (1 t) knoffelpoeier
2,5 ml (½ t) fyn komyn sout na smaak 125 ml (½ k) amandelmeel
125 ml (½ k) veganistiese kaas, fyngerasper
1 vel nori, gesnipper (opsioneel)
60 ml (¼ k) plantgebaseerde melk 125 ml (½ k) broodkrummels of fyngemaalde Corn Flakes
Voorverhit ’n lugbraaier of oond tot 180 °C.
1 Laat stoom die
blomkool tot gaar en sag en laat in die yskas afkoel. 2 Verhit die olie in ’n pan en braai die ui tot deurskynend. Voeg die knoffelpoeier, komyn en sout by, en braai nog ’n paar minute of tot die uie gekaramelliseer is. Hou eenkant.
3 Plaas die afgekoelde blomkool in die bak van ’n voedselverwerker en pols tot dit die tekstuur van rys het. Wees versigtig om dit nie so fyn te pols dat dit ’n puree word nie.
4 Skep die blomkoolrys in ’n tee- of kaasdoek, druk die oortollige vloeistof uit en plaas in ’n mengbak.
5 Voeg die uiemengsel, meel, kaas en nori, indien gebruik, by en meng tot die mengsel ’n deeg vorm. Verdeel die deeg in 6 balletjies en vorm in ronde koekies. 6 Plaas die melk en krummels in twee afsonderlike vlak bakke. Rol die koekies een-een in die melk en daarna in die krummels. Plaas op ’n bakplaat en bespuit albei kante met kossproei.
7 Bak die koekies 12 min. in die lugbraaier en draai halfpad deur die baktyd om. As jy jou oond gebruik, bak die koekies 20-25 min. en draai halfpad om. 8 Sit die koekies voor saam met tamatiesous, ’n veganistiese mayonnaise of tartarsous, indien verkies.