HIERDIE WEEK IN DIE GESKIEDENIS 15 OKTOBER 1923 – INSULIEN IN GROOTMAAT VERVAARDIG
In 1921 het die Kanadese dokter Frederick Banting en sy assistent, Charles H. Best, ’n ontdekking gemaak wat gelei het tot die ontwikkeling van behandeling vir diabetes. Frederick en Charles het ’n manier gevind om die hormoon insulien uit die liggaam te trek en dan daarmee die siekte te behandel.
Dit word beskou as ’n baie groot deurbraak in die mediese veld.
Aan die begin het Frederick en Charles insulien vanuit honde gekry, maar dit was nie die skoonste vorm wat hulle kon gebruik nie. In 1922 het hulle dit reggekry om ’n pasiënt met diabetes se suikervlak binne 24 uur na normaal te laat terugkeer. Dit is gedoen met insulien wat uit varke gehaal is.
In 1923 het die Amerikaanse maatskappy Eli Lilly begin om die insulien op grootskaal te produseer. In dieselfde jaar het Frederick en ’n Skotse dokter genaamd JJR Macleod ook die Nobelprys vir
Fisiologie ontvang vir hul werk.
Die insulien wat uit varke gehaal is, was egter nie perfek nie omdat sekere pasiënte allergies was daarvoor. Die eerste sintetiese insulien is in 1978 gemaak met behulp van bakterieë. Eli Lilly het in 1982 begin om dié insulien te verkoop onder die handelsnaam Humulin. Die insulien wat vandag gebruik word, kom in baie vorme – van dié wat die liggaam self maak tot sintetiese vorme soos Humulin. Danksy dekades se navorsing kan mense met suikersiekte kies watter hulle wil gebruik, gegrond op hul leefstyl en wat hulle benodig. Vandag kry jy insulienpenne en insulienpompe. Dit is nie ’n geneesmiddel vir diabetes nie, maar het al dikwels die lewe van lyers gered.