Nathan Kleinhans
ONS het nog altyd geweet Suid-Afrikaanse kinders bars van talent, maar wie sou ooit hierdie oorvloed van gawes kon voorspel? Honderde inskrywings het vanjaar van reg oor die land vir Huisgenoot se tweede aanlyn eisteddfod ingestroom – en die deelnemers het ons weer eens met hul indrukwekkende video’s oorrompel.
“Die kinders is só talentvol,” sê die sangeres Lynelle Kenned, die beoordelaar van die sangkategorie. Sy het ook haar wenke in ’n aanlyn meesterklas met leerders gedeel. “Dis so ’n voorreg om te kan sien hoe hulle belangstel en die selfvertroue het om deel te neem.”
Die Huisgenoot Eisteddfod is ’n spesiale platform vir leerders, sê sy. “Dis ook ’n wonderlike manier vir ons as professionele kunstenaars om in voeling te kom met die jeug en as mentors op te tree. Dis wonderlik om brûe te bou tussen mense in die bedryf en dié wat dalk later daarvan deel kan raak.”
Skoolleerders kon in hul ouderdomsgroep deelneem in vier afdelings: poësie-voordrag, prosa-voordrag, sang en redenaars. ’n Inskrywing het elkeen toegang gegee tot aanlyn meesterklasse wat deur topkunstenaars aangebied is, en dan moes die kinders self voor die kamera inskuif en hul slag wys. Die meesterklasaanbieders was ook die beoordelaars en het noukeurig deur die honderde inskrywings gewerk.
Die aktrise Roeline Daneel (prosa), die omroeper Sue Pyler-Slabbert (redenaars) en die stemkunstenaar Frieda van den
Heever (poësie) was saam met Lynelle en die Huisgenoot-span in die warm stoel.
Elke deelnemer is beloon met ’n goud-, silwer- of bronstoekenning, met die kategoriewenners wat elkeen ’n spesiale rooi-toekenning, die topprys in die kategorie, én prysgeld van R1 500, geborg deur Arikaans.com, gekry het. Hulle wen ook elkeen ’n opvoedkundige tabletrekenaar van Bubblegum.
Boonop is daar uit al die deelnemers een Eisteddfod-ster van die jaar gekies – die toppresteerder uit ál die deelnemers en kategoriewenners!
Dié jong kunstenaar stap weg met R10 000 kontant, met trots geborg deur Afrikaans.com.
En wie is eindelik aangewys as vanjaar se Eisteddfod-ster van die jaar, die toppresteerder met daardie iets ekstra? Die veelsydige Judi Hattingh van Kaapstad – voorwaar een van ons heel blinkste sterre van die toekoms!
Besoek Huisgenoot.com om te sien watter deelnemers goud, silwer en brons in ons tweede eisteddfod ontvang het, en ook om na die inskrywingsvideo’s van al die kategoriewenners te kyk.
Hier is die topdeelnemers wat in elke kategorie bekroon is met ’n spesiale rooi-prys vir uitsonderlike prestasie: die kategoriewenners van Huisgenoot Eisteddfod 2023.
Ons is trots op julle!
Kategoriewenner: Sang
“Al vandat ek kan loop, is ek mal oor sing en om mense te vermaak. Waar ander seuns wild en met karretjies buite gespeel het, wou ek net sing. Ek het elke Lollos- en Tannie Carike-liedjie geken en uit volle bors gesing. Ek het ’n mikrofoon en luidspreker vir my verjaardag gekry, en toe gaan dit net nie. “Ek het die ‘Trompie’-liedjie van Brendan Peyper gesing, want dis baie mooi en my stem werk lekker met die liedjie. Dit het ook my Afrikaanse liedjie vir die jaar geword waarmee ek met optredes baie sukses behaal het.
“Ek gaan die wengeld spaar. Ek het met elektroniese klawerbordlesse begin om myself te begelei. Ek wil graag vir my een koop om by die huis te oefen.”
Gr. 4-7