GEHUURDE SONKRAGSTELSELS EN VERSEKERING

DEESDAE kan jy as ’n huiseienaar ’n sonkragstelsel huur. Vir baie mense maak dit sin, want jy hoef jou nie te kwel oor die installering nie, en gewoonlik ook nie oor die onderhoud nie. Die verhuringsmaatskappye het verskillende opsies; dus kan jy kies wat jou sak pas.

Maar wat van versekering? Sumarie Greybe van die digitale versekeringsplatform Naked beantwoord vir ons vyf vrae.

1 WIE IS VERANTWOORDELIK VIR DIE VERSEKERING?

Gewoonlik die huurder, tensy die kontrak anders vermeld. Die versekering dek jou as huiseienaar/huurder teen skade of diefstal nadat die stelsel geïnstalleer is en jy dit begin gebruik. Lees die ooreenkoms met die verhuurder baie goed en maak seker jy betaal nie vir oorvleuelende versekering nie. Sou die verhuringsmaatskappy se versekering byvoorbeeld skade of verlies tydens vervoer en installering dek, hoef jou polis eers te begin nadat die installering gedoen is.

Vra jou versekeraar om te kyk dat die installeerder die korrekte sertifisering het en aan munisipale vereistes voldoen. Dit is belangrik, want swak vakmanskap kan byvoorbeeld ’n brandgevaar veroorsaak. Jy moet ’n nakomingsertifikaat kry dat daar aan alle veiligheidsvoorwaarders voldoen is.

Doen dít: As jy wonder watter verhuurder om te gebruik, vergelyk kwotasies en vra verwysings van kennisse.

2 WERK VERSEKERING VERSKILLEND VIR LOSSTAANDE HUISE EN DEELTITELS?

Sonkragstelsels word gewoonlik onder geboueversekering gedek. Die hele stelsel is ’n vaste toestel aan jou eiendom – al huur jy dit. Indien die omskakelaar of batterye aan die geïnstalleerde sonkragstelsel gekoppel is, word die waarde daarvan saam met die waarde van die sonkragstelsel onder die gebouedekking gevoeg.

■ Indien jy ’n losstaande huis besit, kan jy die waarde van die stelsel by jou geboueversekeringspolis voeg. Doen dit op die versekeraar se app of vra jou makelaar vir die aanpassing.

■ As jy die huis huur en die eienaar installeer die stelsel, is die eienaar verantwoordelik aangesien dit onder gebouedekking val.

■ Indien jy die eienaar of huurder van ’n deeltitel is, neem die beheerliggaam gewoonlik geboueversekering namens al die eienaars uit. Die deeltitel se eienaar kan vra om die versekerde bedrag van die eenheid se gebouedekking te verhoog om spesifiek die sonkragstelsel in te sluit. Doen dít: Vra skriftelike bevestiging dat jy wel die dekking het.

3 WAT WORD ALLES GEDEK?

Die herstel of vervanging van die panele en ander parte indien dit beskadig, gesteel of vernietig word.

Dit moet weens ’n versekerbare gebeurtenis wees, byvoorbeeld diefstal, brand of slegte weer. Risiko’s vir sonpanele sluit in:

■ Sonpaneeldiefstal. Dit gebeur ál meer namate die waarde en aanvraag toeneem.

■ Vandalisme.

■ Weerverwante skade soos storm- of haelskade.

Doen dít: Kyk of persoonlike aanspreeklikheid ook onder die geboueversekering gedek word. Dit dek jou teen ’n ongeluk wat iemand anders beseer of hul eiendom beskadig. ’n Voorbeeld is as ’n kortsluiting in die bedrading van jou sonkragstelsel wat nie die vervaardiger of installeerder se skuld is nie ’n brand veroorsaak wat jou buurman se eiendom beskadig.

4 WAT WORD NIE GEDEK NIE?

Slytasie, dienste en instandhoudingsverwante eise.

Dit moet onder jou verskaffer se waarborg- en diensooreenkoms gedek word. Enigiets wat onder ’n waarborg val, sal nie deur jou versekeraar gedek word nie.

Dit is jou verantwoordelikheid om te verstaan waarvoor die verhuurder onder sy waarborgen diensooreenkoms verantwoordelikheid aanvaar. Die verhuurder moet verkieslik in ’n skriftelike kontrak uitstippel waartoe hy hom in terme van die instandhouding en dienste verbind.

Vra of daar ’n volledige waarborg vir al die parte is aangesien jou versekering waarskynlik nie slytasie en veroudering dek nie. Dit is belangrik dat jou diensverskaffer alle moontlike instandhoudingswerk doen. Doen dít: Vra die verhuurder om ’n waarborg dat hy die stelsel in die geval van tegniese probleme vinnig sal kan herstel. Die onderneming moet minstens oor alle nodige onderdele beskik.

5 MOET JY DIT TEEN DIE VOLLE VERVANGINGSKOSTE VERSEKER?

Ja, selfs al huur jy, ingeval dit heeltemal verwoes word. Die versekerde waarde moet ook die koste van die installering insluit.

Doen dít: Onthou om elke jaar by die verskaffer uit te vind wat die vervangingswaarde van die stelsel is. Die waarde kan toeneem of afneem. Pas dan die versekerde waarde op jou polis aan.