SESJARIGE SLAAP NOG BY SY MA
My kleinseun is nou ses jaar oud en hy gaan volgende jaar laerskool toe.
Ek en my seun (die kind se pa) is egter baie bekommerd oor die ma se optrede.
Sy werk nie en laat hom toe om saam met haar wakker te bly tot sy snags elfuur gaan slaap.
Opstaantyd vir hulle albei is soggens negeuur.
Die kind slaap by haar, terwyl my seun al jare in die spaarkamer slaap.
Sy voel dit sal beter werk as hulle ’n groter bed koop en hulle al drie dan die bed kan deel.
Volgens haar vrees sy as haar kind in ’n ander kamer slaap, sal sy nie hoor wanneer hy haar in die nag dalk nodig het nie.
My seun oorweeg dit nou om te skei, want hy voel sy vrou is “eerder met hul seun getroud”.
Hoe kan ons haar benader? Sy maak verskonings en gaan aan die skree wanneer my seun met haar daaroor probeer praat.
Daar is ’n strik waarin baie ouers trap met die geboorte van hul kinders: Dit word baie gou ’n ons-en-jy-situasie. Die ma en kinders teen die pa wat alleen staan.
Dit is wanfunksioneel en is beslis hier aan die gang.
Kenners maan ook dat ouers van dag een af babas glad nie moet toelaat om in hul bed te slaap nie.
Die volgende is wat daaromtrent gedoen kan word:
■ Kry die kind so gou moontlik in sy eie kamer. Hy moet elke aand in sy eie bed gesit word en een van die ouers moet in die kamer bly tot hy slaap.
Sou hy in die nag by hulle wou inkruip, moet hy teruggeneem word na sy bed toe, al is dit 10 keer per nag.
Hy sal heel waarskynlik aan die begin snags angstig raak, maar die ouers sal maar net moet deurdruk.
■ Skep die regte slaaproetine deur elke aand op dieselfde tyd te eet, te bad en rustig te ontspan voor slaaptyd.
Slaaptyd is seweuur vir drietot vyfjariges, agtuur vir sestot 12-jariges en tienuur vir tieners.
■ Die kind se kamer moet netjies en slaapvriendelik wees. Hy moet ook leer dat dit ’n veilige plek is om te speel, te leer en te rus.
Deur haar kind soos ’n klein grootmensie te hanteer wat by haar roetine inval veroorsaak die mamma die teenoorgestelde van wat sy dink.
Haar kind bly afhanklik – hy ontwikkel nie stelselmatig om sekere onafhanklikheidsmylpale te bereik nie.
Ek voorsien probleme wanneer hierdie kind oor ’n paar maande skool toe gaan.
Die onderwyser gaan ’n kind in haar klas hê wat geïrriteerd gaan wees van min slaap en sekere take nie sonder hulp sal kan verrig nie.
Ouerskapslypskole sal ’n groot bate wees en die ouers kan gerus ook huweliksberading oorweeg om hul verhouding weer op koers te kry.
’SOU DIE KIND IN DIE NAG BY HULLE WOU INKRUIP, MOET HY TERUGGENEEM WORD NA SY BED TOE, AL IS DIT 10 KEER PER NAG’ – IRMA