Henck Conrey
Daar’s g’n keer aan dié man nie – hy’s tans in drie reekse op die kassie te sien
UITERS BEDRYWIG
Dié akteur, regisseur en vervaardiger is een van ses deelnemers wat kyk of hulle ’n totale verandering aan hul leefstyl kan maak in die kykNET-program Fiks of niks. Deelnemers pak oor nege maande ’n holistiese fiksheidsreis aan terwyl hulle ook hul eie lewe bestuur.
Henck is deur ’n fiksheidstydskrif uitgedaag om op sy fiksheid te fokus en ’n gesonder balans in sy lewe te handhaaf; hy het nie net aan die reeks deelgeneem nie, maar ook as vervaardiger betrokke geraak. “Die program het so deel van my lewe geword dat dit deesdae normaal voel om oral met ’n kameraspan op te daag,” sê Henck (36).
Hy trek ook weer sy aanbiedersbaadjie aan vir die 10de seisoen van Vat jou goed en trek waarin hy en sy span 13 families help wat sukkel om hul eiendom te verkoop. En van November gee hy en die oormaakdokters mense weer ’n rede om te glimlag in die vyfde seisoen van die VIA-oormaakreeks Dr. Nou! “Ek geniet dit om verskillende hoede te dra en elke projek kom met sy eie uitdagings en belonings,” sê Henck.
SKITTER OP DIE KASSIE
Hy het eintlik al in 2010 sy debuut op TV gemaak as die aanbieder van Classic Clashes, maar is eers raakgesien toe hy later daardie jaar ’n rol in Bay City losslaan. Daarna het rolle in 7de Laan en The
Wild gevolg.
Ná twee jaar van toneelspel het hy saam met sy sakevennoot Richard Opperman ’n produksiemaatskappy, RichCON, begin. Sedertdien woeker Henck voor en agter die skerms.
“Die afgelope 10 jaar was my fokus grootliks op leefstylprogramme; ons het meer as 300 episodes al vervaardig,” sê hy. “As aanbieder van ’n program het ek die geleentheid om meer van mense te leer en die lewe deur ander se oë te sien.”
VERMAAKBEDRYF WINK
Hy het in Gqeberha grootgeword en het in 2005 aan die Hoërskool Framesby gematrikuleer. “Vandat ek kan onthou wou ek in die vermaakbedryf wees, maar my ouers wou hê ek moes iets standvastiger studeer,” vertel Henck. Hy het ná skool regte gaan studeer aan die Nelson Mandela-Universiteit terwyl hy deeltyds dramaklasse geneem het. Die vermaakbedryf het bly wink.
“Die bedryf het my in my finale jaar geroep en ek het sedertdien nog nooit weer teruggekyk nie.”
GESEËN MET DIE BESTE OUERS
Henck is vol lof vir sy ouers, Desireë (64) en Henck sr. (66). “Ek is geseën met die beste ouers in die wêreld. Hulle ondersteun my, het my bygestaan deur moeilike tye en is my grootste aanhangers.”
Hy is ’n enigste kind en het vroeër vanjaar van Johannesburg na Pretoria verhuis om nader aan sy ouers te wees. “Ek was gelukkig om ’n huis op die landgoed net langs hulle s’n te vind en is vandag ’n trotse Pretorianer,” sê hy.
Hy maak ’n punt daarvan om sy ouers te bederf. “Ek geniet dit om hulle op vakansies oor die wêreld heen te stuur.”
Henck is tans enkellopend en eintlik ’n bietjie van ’n huishen. “My lewe is vreeslik besig, so as ek die kans kry, geniet ek dit om rustig by die huis te wees.” ❑